प्रचण्ड व कोइराला खँल्हाबल्हा
येँ (सन्ध्या टाइम्स)/माओवादी अध्यक्ष प्रचण्ड व नेपाली कांग्रेस सभापति सुशील कोइराला दथुइ न्यागू बुँदे सहमति कार्यान्वयन यायेगु निंतिं गम्भीर जुयाः न्ह्याः वनेगु सहमति जूगु दु। न्यागू बुँदे सहमति जुइधुंकाः प्रचण्ड व कोइराला दथुइ जूगु थ्व न्हापांगु खँल्हाबल्हा खः। थौं सुथ न्हापां हे भाजु प्रचण्ड कोइराला निवास खँल्हाबल्हा यानादीगु खः ।
भेटवार्ताय् सभापति कोइरालां स्वलाया दुने शान्ति व संविधानय् केन्द्रित जुयाः न्ह्याः वनेत सुझाव बियादीगु खः। प्रधानमन्त्री खनालया राजीनामाया खँ मूल विषय मजूसां राष्ट्रिय सरकार दयेकेगु निंतिं माःगु कथंया कुतः यायेगु सहलह निम्ह नेताया दथुइ जूगु खः ।
भेटवार्ता लिपा अध्यक्ष प्रचण्डं संचारकर्मीलिसे खँ ल्हासें न्यागू बुँदाया सहमति कार्यान्वयन बारे गम्भीर सहलह जूगु खँ कनादिल। वय्कलं प्रधानमन्त्रीया राजीनामा बारे खास हे खँ जूगु मदु धयादिल। कांग्रेसं यदि शान्ति प्रक्रिया अःपुक वन धाःसा प्रचण्ड हे प्रम जूसां जिउ धायेधुंकूगु दु ।
थ्वहे दथुइ न्यागू बुँदे सहमति कार्यान्वयन बारे सहलह यायेत नेपाली कांग्रेसं थौं चिचीधंगु राजनीतिक दलया बैठकय् सःतातःगु दु। संविधानसभाया म्याद थप याये न्ह्यः कांग्रेसं न्ह्यःने तःगु झिगू बुँदाया सर्त बारे सहलह ब्याकूगु चिचीधंगु दलया नेतातलिसे हे थौं सहलह ब्याकेत्यंगु खः ।
