न्यागू बुँदाया व्याख्या मखु कार्यान्वयन या

म्याद फुइधुंकूसां बल्लबल्ल बचे याःगु संविधानसभाया म्याद स्वलाया लागिं थपे याःगु थौं छवालं मयात। तर थ्व छवाः तक नं स्वंगू दल दथुइ जूगु न्यागू बुँदे सहमतिइ प्रधानमन्त्रीं राजीनामा बीगु खँया आशय छु खः धइगु खँय् दलतय् दथुइ विवाद जूगु दु। थुकिं यानाः स्वलाया दुने याये धाःगु सेना समायोजन, शान्ति प्रक्रिया आदि सम्बन्धी छुं हे ज्या न्ह्यःने न्ह्याये फयाच्वंगु मदु। दलतय्सं शान्ति प्रक्रियाया छुं हे ज्या याःगु नं मदु। मेपिं ला मेपिं हे जुल, शान्ति प्रक्रियाया लागिं संविधानसभा भंग यायेमाःसां यायेत तयार दु धाःपिं नेपाली कांग्रेसया नेतात तकं आः शान्ति प्रक्रियायात छखे तयाः प्रधानमन्त्रीया राजीनामा लिउलिउ ब्वाँय् वनाच्वंगु दु। प्रधानमन्त्री झलनाथ खनालं राष्ट्रिय सहमति तयार जुइ सातकि हे थः राजीनामा यायेत तयार दु धकाः सार्वजनिक रुपं संवोधन हे यायेधुंकूगु अवस्थाय् आः नेपाली कांग्रेसं राष्ट्रिय सहमतिया वातावरण निं दयेकेगु ज्या याःसा बांलाः। राष्ट्रिय सहमति कायम मजूनिवं प्रधानमन्त्रीं राजीनामा बिउगु कारणं न्हय्ला तक प्रधानमन्त्री ल्ययेगु ज्यां हे देय्या महत्वपूर्ण ई सितिकं वंगु खँ सकस्यां सिउ। आः ला वय्कःपिंके जम्मा दुगु हे स्वलाया ई खः। थ्व ईयात सरकार गठन थेंज्याःगु विवादास्पद व याकनं मजुइगु ज्याय् खर्च यानाच्वनेगु पलेसा शान्ति प्रक्रियाय् हे ध्यान बियाः संविधान निर्माणयात याकनं पूवंकूसा बांलाइगु खः। वय्कःपिंके मुक्कं १२ हफ्ताया ई दुगु खः। न्हापांगु हफ्ता सितिकं वनेधुंकल। मेगु ईयात लुँचुं थें हे मूल्यवान तायेकाः खर्च यायेगु कुतः जुइमाः। आः न्यागू बुँदाया व्याख्या व विश्लेषणय् मखु, न्यागू बुँदाया कार्यान्वयनय् बः बीमाः ।

More Stories Like this