प्रहरीं जित स्यायेगु कुतः यात : रामदेव

भ्रष्टाचार विरुद्ध अनसन सुरु याःम्ह योग गुरु रामदेवं प्रहरीं अनसन स्थलय् हस्तक्षेप यानाः थःत स्यायेगु कुतः याःगु दावी यानादीगु दु ।

आइतवाः प्रहरी हस्तक्षेप लिपा हरिद्वार आश्रमय् थ्यंकूम्ह रामदेवं छगू पत्रकार सम्मेलन यानाः 'इन्काउन्टर' यानाः स्यायेत स्वःगु धयादिल । वय्कलं प्रहरीं थःत पशुया थें व्यवहार याःगु धयादिसें प्रहरीया बर्बरतापूर्ण हस्तक्षेपया भर्त्सना यानादिल ।

प्रहरीं थःगु हे न्ह्यने मस्त व मिसातय्त लछार पछार याःगु धयादिसें वय्कलं सत्याग्रहलय् सरकारं अज्याःगु अत्याचार याइ धकाः थःम्हं गबलं बिचाः हे मयानागु धयादिल । घटना प्रति सरकार व सोनिया गान्धीं क्षमायाचना यायेमाःगु माग नं वय्कलं यानादिल ।

सरकारया बर्बरतां थःगु अभियान मदीगु दावी यानादिसें रामदेवं थः म्वातले भ्रष्टाचार विरोधी अभियान जारी जुयाच्वनीगु धयादिल ।

अनसनय् प्रहरी हस्तक्षेप / रामदेवयात थःगु हे आश्रम यंकल

थ्वस्वयां न्ह्य: भ्रष्टाचारया विरोधय् अनसन सुरु याःम्ह रामदेवया अनसनय् प्रहरीं आइतवा: सुथय् हस्तक्षेप याःगु ख: । सुथय् प्रहरीं दिल्ली स्थित रामलिला मैदानय् च्वनाच्वंपिं अनसनकारीतय्त लाठीचार्ज व अश्रुग्याँस छ्यला तितरबितर यानाछ्वःगु खः । रामदेवयात धाःसा प्रहरीं हे ज्वनायंकाः हरिद्वारस्थित वय्कःया आश्रमय् त्वःता बिउगु खः ।

प्रहरीं रामलिला मौदानं रामदेवयात छुं ई नियन्त्रणय् काःगु व अन लिपा हरिद्वार यंकूगु खः । सरकारं दिल्लीइ निषेधाज्ञा जारी यानातःगु व रामदेवयात तक्वः हे अनसन मच्वनेत इनाप याःसां द्लद्वः मनूत हयाः अनसन च्वंगुलिं हस्तक्षेप यायेमाःगु खँ भारतीय प्रहरीं धाःगु दु ।

रामदेवया अनसनय् प्रहरीं हस्तक्षेप याःगु घटनायात कयाः भारतया प्रमुख प्रतिपक्षी दल भारतीय जनता पार्टीं विरोध याःगु खः । भारतीय जनता पार्टीं प्रधानमन्त्री मनमोहन सिंह व सोनिया गान्धीं माफी फ्वनेमाःगु माग यासें २४ घण्टे धर्ना ज्याझ्वः सार्वजनीक या‍‍:गु दु ।

भ्रष्टाचारविरुद्ध कडा कानून ह्येमा:गु, भारतया नागरिकतय्सं कर छले यानाः विदेशी बैंकय् जम्मा यानातःगु ध्यबा भारतय् हे लितहेमाःगु, भ्रष्टाचार याइपिंत मृत्युद बीमा:गु लगायत माग याना: रामदेवं शनिवा: निसें रामलीलाय् अनशन सुरु याःगु खः ।

More Stories Like this