माग पूमवंसा जनविद्रोहलय् वनेगु - मधेशी युवा

ये (झीगु स्वनिगः)

मधेशी युवा लोकतान्त्रिक पार्टीं देशय् पूर्ण शान्ति प्रक्रिया क्वःचायेकेगु खःसा मधेश मुक्तिया नितिं ल्वानाच्वंगु भूमिगत राजनैतिक दल व उमि लडाकुतय्त सुरक्षित व्यवस्थापन हे पूर्ण शान्ति प्रक्रिया जुइगु बिचाः प्वंकूगु दु । म्हिगः रिपोर्टर्स क्लब नेपालय् पत्रकार सम्मेलन याना शान्ति प्राप्तिया नितिं माओवादीया लडाकुत सेनाय् समायोजन यायेगु स्वयाः न्ह्यः मधेशया भूमिगत पार्टीया लडाकुपिनिगु नं ल्याः निर्धारण याना संयुक्त रुपय् सेनाय् समायोजन यायेमाःगु माग तसें यदि माग पूमवंसा मधेश केन्द्रीत जनविद्रोहलय् वनेत बाध्य जुइगु धाःगु दु । तःधंगु दलतय्सं पहाडीपिनिगु नितिं जक शान्ति माःगु खःसा उगु भ्रम जुइगु धयादिसें देय्या धात्थेंया शान्ति मालाच्वंगु खःसा दकले न्हापां तराईयात शान्ति दयेकेमाः, तराईयात तःधंगु दल व स्थापित मधेशवादी दलतय्सं बेवास्था याःसा मेधशी युवा लोकतान्त्रिक पार्टी लगायत मधेशी युवा पासापिं छधी जुयाः संयुक्त रुपय् कडा विद्रोहलय् कुहां वयेगु ख्याच्वः ब्यूगु दु ।

पत्रकार सम्मेलनय् पार्टीया नायः राजेश कुमार झां धयादी - जिमिसं संविधान सभाध्यक्ष, प्रधानमन्त्री, एनेकपा माओवादी पार्टी लगायत थीथी थासय् पार्टीया बिचाः व माग न्ह्यःब्वये धुनागु दु । जेठ २३ गते सोमबाःतक्क नं जिमिगु माग पूमवंसा २४ गतेनिसें जनविद्रोहलय् वनेगु जुइ । जिमिगु नं द्वलंद्वः भूमिगत लडाकुत दु, भूमिगत लडाकुपिनिगु संयुक्त फोर्स पूर्ण तयारीइ दु, जिमिगु विद्रोहया ज्वाला तराईलय् जुल धाःसा छु नं तागतं स्यायेफइ मखु ।