सुगम ग्यासयात मीगु उजं ब्यूगु लितकाल

येँ (झीगु स्वनिगः)

उच्च अधिकारीया मिलेमतोय् जोखिमयुक्त सुगमया सिलिण्डर ग्यास मीत आयल निगमं ब्यूगु उजं शुक्रवाः हाकनं लित काःगु दु । उपभोक्तातय्त असुरक्षित सिलिण्डर म्यूगुलिं 'कम्पनी खारेजी' तक्कया कारबाही जुइमाः धयातःगु सुगम ग्यासयात निगमं अःखतं संरक्षण ब्यूगु खः । उच्च स्रोतयाकथं थुकिया बारे बुखा पिहांवयेवं बाणिज्य छ्याञ्जेया दबाबय् शुक्रबाः मीगु उजं लित ब्यूगु खः । पेट्रोलियम डिलर्स एशोसिएसनया पुलांम्ह नायः शिवप्रसाद घिमिरे सञ्चालक दुगु थ्व कम्पनीया बजाःया हिस्सा मतनेमाः धइगु सदासय तयाः निगमं सुगम ब्राण्डया कारोबार न्ह्याकेत उजं ब्यूगु दु । निगमं छुं दिं न्ह्यः एभरेस्ट ग्यास उद्योगपाखें सुगमया सिलिण्डर जायेकाः मीत उजं ब्यूगु खः । एभरेस्ट उद्योगं ग्यास जायेकूसां नं सुगमं हे ग्यास मी दइ । निगमं बजारय् सुगमया पीद्वः सिलिण्डर दुगु व उकिइ मध्ये स्वनिगलय् झिंन्हय्द्वः सिलिण्डर एभरेस्ट ग्यासयात जायेकेत ब्यूगु खः ।

निगमया उच्च अधिकारीया मिलेमतोय् जोखिमयुक्त सुगमया सिलिण्डरय् ग्यास जायेकाः मीत ब्यूगु स्रोतं धाःगु दु । मेपिनिगु ब्वहलय् च्वनाः ज्या यानाच्वंगु खा पिहांवयेवं निगमं सुगमया ग्यास आयात इजाजत रोक्का जक याःगु खः । आपालं दबाबलिपा निगमया उच्च अधिकारीं एलपी ग्यास कारोबार सम्बन्धी विनियमावलीया थः अनुकुल व्याख्या याना सुगमयात कारोबार यायेत उजं ब्यूगु खः । निगमं एलपी ग्यास कारोबार सम्बन्धी विनियमावलीया १७ त्यलाः सुगमया ग्यास सिलिण्डिर मीत ब्यूगु दाबी याःगु दु । थ्व बुादाय् छु नं कारणवश उद्योग पूर्ण आंशिक वा अस्थायी रुपय् सञ्चालनय् मदयाः ग्यास आपूर्ति याकेमफुगु खाय् निगम विश्वस्त जूसा मेमेगु उद्योगय् ग्यास जायेकेत बिइफइगु न्ह्यःथनातःगु दु । थ्वहे बुादाय् त्यलाः निगमं सुगमयात ग्यास जायेकेत ब्यूगु दाबी नापं याःगु दु ।

More Stories Like this