'पार्टीइ अहंकारवाद व अधिनायकवाद’
येँ (झीगु स्वनिगः)
नेपाली कांग्रेसया नेता अर्जुन नरसिंह केसीं कांग्रेसया नेतृत्व अहंकार व अधिनायकवाद जुइत कुतः यानाच्वंगु दु धकाः दावि यानादीगु दु । नेपाली कांग्रेस चितवन क्षेत्र नं. ४ या ग्वसालय् म्हिगः सनिवाः मंगलपुरय् क्वचाःगु विकास सम्वन्धि प्रशिक्षण ज्याझ्वःया उलेज्या यानादिसें नेता केसीं कांग्रेस पार्टी नेतृत्वया अहंकार व अधिनायकवाद बिरुद्ध अथे धयादीगु खः । वय्कलं धयादिल 'अहंकार व अधिनायकवाद नेतृत्वय् दु, उगु सोचया विरुद्ध कार्यकर्ता दने फयेमाः ।' नेता केसीं कांग्रेस पार्टीया नेतृत्व अधिनायकवाद व अहंकार जुल धैगु खँ स्पष्ट धाःसा यानामदी । वय्कलं पार्टीया सु नेतां अथे अहंकार व अधिनायकवाद लागू यानाच्व धैगु स्पष्ट मयासे तःक्वः मछि हे लिसा कयादिल ।
पार्टीयात जीवन्त यानाः तयेगु नितिं पार्टी दुनेया कमी कमजोरीया बारे आलोचना यायेमाः धकाः नं नेता केसीं बहः बियादिल । वय्कलं कांग्रेससया इतिहास न्ह्याबले नं अलोकतान्त्रिक शक्तिलिसे ल्वानाः वयाच्वंगु दु धासें वय्कलं २००७ सालंनिसें गणतन्त्र स्थापनाया आन्दोलन तक थ्यंगु इलय् कांग्रेसं म्हितूगु भूमिका व नेतृत्वया चर्चा तकं यानादिल । नेता केसीं चाः हिइका एकीकृत माओवादी विरुद्ध नं न्वंवानादीगु खः ।
