गणतान्त्रिक कासा क्वचाल

येँ (झीगु स्वनिगः)

नेपाल गणतान्त्रिक खेलकुद धेंधें बल्लाः कासा २०६८ क्वचाःगु दु । युवा तथा खेलकुद मन्त्री टोपवहादुर रायमाझी मूपाहांकथं झायादीगु उगु कासा क्वचाःगु ज्याझ्वलय् थीथी धेंधें बल्लाः कासाय् न्हाप, ल्यू व लियांल्यू लाःपिन्त वाइसिएलया नायः गणेशमान पुनं दसिपौ, मेडल व दां लःल्हानादीगु खः। रंगशाला कभर्ड हलय् म्हिगः शनिवाः कबर्डी धेंधेंबल्लाः कासाय् निर्वाचन क्षेत्र नं. ६ न्हाप लाःगु दुसा ७ ल्यू व ९ लियांल्यू लाःगु दु ।म्हिगः जूगु न्हापांगु स्वंगू राउण्ड कासाय् उगु ६ नं. त्याःगु खः । उगु क्षेत्रया क्याप्टेन क. सरु -चिजा) गर्तौला खः । अथ्यहे त्याकूपिन्त येँ जिल्लाया इन्चार्ज व के.स. पवनमान श्रेष्ठं त्याकादीपिं खेलाडीतय्त सिन्हः तिकाः भिंतुना वियादीगु खः । येँ सहिद स्मृति क्लवया ग्वसालय् जूगु उगु कासा स्वक्वःगु गणतान्त्रिक दिवसया लसताय् जूगु खः ।

अथेहे, पाँच कि. मि. या ब्वाज्याय् मिजंतय्पाखें सन्तोष राइ न्हाप, ज्ञान भट्टराई ल्यू व लक्ष्मण थापा लियांल्यू लाःगु दु । मिसातय्गुपाखें सरस्वति खड्का न्हाप, सजिना दनुवार ल्यू व विन्दु दनुवार लियांल्यू लाःगु दु । तेक्वान्दोपाखें चितवन जिल्ला न्हाप लाःगु दु ।