शान्ति प्रक्रिया पूवंकेगु महत्वपूर्णगु कार्यभार ल्यंदनिः बाबुराम

येँ (झीगु स्वनिगः)

एकीकृत नेकपा -माओवादी)या न्वकु डा. बाबुराम भट्टराईं जनताया पक्षय् संविधान दयेकेगु व शान्ति प्रक्रिया पूवंकेगु महत्वपूर्णगु कार्यभार ल्यं दनिगु जुयाः क्रान्ति व विद्रोहया जनअभियान समाप्त जूगु मदुनि धकाः धयादिल । ता ई न्ह्यःनिसें संचारकर्मीतय्सं संचालन यानाः वयाच्वंगु जागरण मिडिया सेन्टरया स्वक्वःगु अधिवेशनया म्हिगः येँय् उलेज्या यानादिसें माओवादीया नेता भट्टराईं अथे धयादीगु खः । वय्कलं संविधानसभा विघटन यायेगु चाहाना तयाच्वंगु तत्वत स्वंगू दलया दथुइ जूगु न्यागू बुँदाया सहमतिपाखें हाकनं छकः पराजित जूगु दुसां इपिं अझ नं प्रतिगमन लित हयेगु नितिं चलखेल यानाच्वंगु जुइफु धयादिल । उकिं हे आःया अवस्थाय् राष्ट्रिय सहमतिया सरकारया नेतृत्व अज्वःपिनिगु ल्हातय् बिइ मजिउ धकाः नं एकीकृत माओवादीया नेता भट्टराईं बहः बियादिल । येँय् जूगु उगु ज्याझ्वलय् एमालेया नेता प्रकाश ज्वाला व अधिवक्ता पुष्पा भुसालं मुलुकय् सामन्तवादया अवशेष अझ नं ल्यं दनिगु व परिवर्तन मालाच्वंपिं दलित मिसा समुदाय अझ नं पीडित जुयाच्वंगु दु धकाः नं धयादीगु दु ।

उगु ज्याझ्वः जागरण मिडिया सेन्टरया नायः रेमबहादुर विश्वकर्माया सभापतित्वय् जूगु खः । ज्याझ्वलय् नेपाल पत्रकार महासंघया अध्यक्ष शिव गाउँले, सेन्टरया सल्लाहाकार पद्म सुन्दरनापं मेमेपिं वक्तातय्सं च्वयेयागु निर्देशनय् समाचार काटेयायेगु सिबें नं सेल्फ सेन्सरया प्रणालीया विकास यायेमाः धकाः धयादिल । उगु ज्याझ्वलय् ब्वति कायेत देय्न्यंकंया दलित संचारकर्मीत उपस्थिति जुयादीगु खः । उगु अधिवेशनं जागरण मिडिया सेन्टरया नितिं न्हूगु नेतृत्व ल्ययेगु तकं ज्या याइ धकाः धाःगु दु । नेपाःया ततःधंगु संचार माध्यमं नेपाःया दलित समुदाययात आवाज गुगु कथं प्राथमिकता बिइमाःगु खः उगु कथं बिया मच्वंगु जुयाः दलित संचारकर्मीत छप्पँ छघी जुयाः न्ह्याः वनेमाः धकाः बहः बियाः वयाच्वंगु दुसा थ्व हे दथुइ सेन्टरया अधिवेशन जूवनाच्वंगु खः । विशेष यानाः दलित नापं राज्यं बहिस्करणय् लाकातःपिनिगु समुदायया समाचार संचारमाध्यमय् पिथनेगु नितिं छु गज्वःगु भूमिका म्हितेमाली धैगु विषयसं नं अधिवेशनय् सहलह जुइ धाःगु दु ।