माओवादी स्थायी समितिइ विवाद
येँ (सन्ध्या टाइम्स)/एकीकृत माओवादीया थौं सुथय् च्वंगु स्थायी समितिया बैठकय् माओवादी नेतातय् दोहोरो सुरक्षा प्रणाली हटे यायेगु धकाः म्हिगः पार्टीया पदाधिकारीतय्सं याःगु निर्णययात कयाः विवाद जूगु दु ।
थौं सुथय् पार्टीया केन्द्रीय ज्याकू पेरिसडाँडाय् च्वंगु स्थायी समितिया बैठकय् वंगु छुं दिं न्ह्यः जक मोहन बैद्य किरण पक्षं नोटअफ डिसेन्ट च्वयेक च्वयेकं नं नेतातय् दोहोरो सुरक्षा प्रणाली हटे यायेगु धकाः याःगु निर्णययात कयाः बैद्य पक्षया नेतात थौं आक्रमक रुपं प्रस्तुत जुइवं बैठकय् विवाद जूगु खँ सूत्रं धाःगु दु ।
सुथय् पौने ८ बजे शुरु जूगु उगु बैठकय् दोहोर सुरक्षा प्रणालीयात कयाः २ घण्टा तक विवाद जुयाः नं छुं निर्णय याये मफुसेंलि बैठक हे कन्हय् जक च्वनेगु धकाः स्थगित याना छ्वःगु खः। सूत्रं बिउगु जानकारी कथं माओवादी नेतातय्त सुरक्षा बिया वयाच्वंपिं लडाकुतय्त हाकनं लडाकु शिविरय् तुं लित छ्वयेगु धकाः संस्थापन पक्षं याःगु निर्णययात कयाः बैद्य पक्ष दकलय् अप्वः असन्तुष्ट जूगु खः। बहुमतया आधारय् अज्याःगु निर्णय यानाः जनसेनायात अपमान यायेगु व मनोबल गिरे यायेगु ज्या याये दइ मखु धकाः नं बैद्य पक्षया नेतातय्सं खबरदारी याःगु खँ धाःगु दु। आःया अवस्थाय् पार्टीया संस्थापन पक्षं आत्मसमर्पण यानाः संसदवादी जुजुं वनाच्वन धकाः नं द्वपं बीगु ज्या जूगु खः। बैद्य पक्षं संविधान जारी जुइ धुंकाः जक जनसेनायात समायोजन यायेमाःगु नापं समायोजनया खँय् सहमति याये न्ह्यः हे मोडालिटी तयार यायेमाः धकाः नं बः बिया वयाच्वंगु दु। मोडालिटी तयार मजुइकं सेना समायोजन यात धाःसा गुगुं नं हालतय् स्वीकार यायेगु जुइ मखु धकाः नं बैद्य पक्षया नेतातय्सं ख्याच्वः बिया वयाच्वंगु खः ।
विवादया दथुइ ५ बुँदा अनुमोदन
थौं च्वंगु माओवादी स्थायी समितिया बैठकं विवादया दथुइ हे स्वंगू दल दथुइ जूगु न्यागू बुँदाया सहमतियात धाःसा अनुमोदन याःगु दु। बैठक धुंकाः माओवादीया प्रवक्ता दिनानाथ शर्मां संचारकर्मीतलिसे खँल्हासें थौंया बैठकं न्यागू बुँदाया सहमतियात अनुमोदन याःगु जानकारी बियादिल। न्यागू बुँदाया उगु सहमतियात कयाः माओवादी लगायत कांग्रेस व एमाले दुने नं विवाद जुयाच्वंगु दु ।
