कन्टेनरया ल्वाभः ज्या वइ तिनिगु जकं खः ला?
येँ (सन्ध्या टाइम्स)/माओवादीं ल्वाभः तयातःगु कन्टेनरया ताःचाः सरकारयात लःल्हायेमाः धकाः नेपाली कांग्रेसं उकुन्ह कडा हे अडान काल। माओवादीं नं उगु ताःचा लःल्हाये मखु धकाः अडान काल। अन्ततः आःयात ताःचा लःल्हायेम्वाःनि, स्वलाया दुने लःल्हाये धइगु सहमति जुल ।
तर थ्व दौरानय् छता खँय् धाःसा अप्वःसिया ध्यान हे मवन कि कन्टेनरय् तयातःगु उगु ल्वाभः वास्तवय् गज्याःगु ल्वाभः खः? छु व ल्वाभः हानं ज्या वइ तिनि ला? अनं पिकाःगु ल्वाभः आः चले तकं जुइ तिनिगु खइ ला?
थौंकन्हय् थीथी कन्टेनरय् माओवादीया स्वद्वः व चाःचू ल्वाभः तयातःगु दु। अले हे परिमाणय् नेपाली सेनाया ल्वाभः नं कन्टेनर दुने तयातःगु दु। माओवादीया ल्वाभः फुक्कं अनमिनया रोहवरय् कन्टेनरय् तःगु खः। उकिं उकी छु छु ल्वाभः दु धइगु खँ माओवादी व अनमिन बाहेक मेपिं सुनां नं मसिउ। माओवादीं ल्वाभः धकाः दर्ता याकातःगु गुलिखे ज्वलं बन्दुक मजुसे पाइप, जिंक आदि थेंज्याःगु सामान तकं दु ।
माओवादीयात शान्तिवार्ताय् हयेगु ज्याय् प्रमुख म्हितादीम्ह मानव अधिकारवादी नेता पद्मरत्न तुलाधरया कथं माओवादी सेना व नेपाली सेनाया ल्वाभः अथे कन्टेनरय् तःगु प्रतिकात्मक जक खः। अथें नं पुलांगु ल्वाभः प्यदँमछि कन्टेनरय् तयेधुंकाः गुलि ला खतं नयाः चले तकं याये मजीधुंकल जुइ ।
तुलाधरया कथं उगु ल्वाभः लःल्हायेगु वा मल्हायेगुया आः अर्थ तकं मदु। थ्व ला 'सिम्बोलिक' जक खः, तर आः हे थ्व ल्वाभः लःल्हात धाःसा उकिया अर्थ माओवादीं आत्मसमर्पण याःगु ठहर जुइ। माओवादी युद्धय् बुनाः वःपिं मखुगु कारणं उमिसं आत्मसमर्पण याःगु भाव लुइ कथंया छुं नं ज्या मयाइगु स्वाभाविक खः ।
भाजु तुलाधरं पुलांगु छगू प्रशंक कनादी - माओवादीया ल्वाभः कन्टेनरय् तःगु इलय् नं उकिया ताःचा छपु सरकारयाके व छपु माओवादीयाके ('वन लक टू की' प्रणाली) तयेगु खँ पिहां वःगु खः। तर थ्व प्रणाली युद्धय् बुनाः वःपिंत जक लागू जुइगु जूगुलिं थ्व थःपिंत स्वीकार्य मजुइगु खँ माओवादीं धाःगु खः। गुकिं यानाः ताःचा छपु जक तयेगु व व नं उमित हे बिया तयेगु 'वन लक, वन की' प्रणाली लागू यायेमाःगु खः। अबलय् हे माओवादीं अस्वीकार यायेधुंकूगु खँ आः वयाः हानं लागू या धायेबलय् माओवादी तयार मजुइगु नं स्वाभाविक खः। उगु इलय् सेना समायोजन न्ह्यः हे ल्वाभः लःल्हाये मालीगु खःसा थःपिं शान्ति प्रक्रियाय् हे वये मखु धकाः माओवादीं राष्ट्र संघयात पौ तकं मच्वसे च्वनाच्वंगु सन्दर्भ नं भाजु तुलाधरं कनादिल ।
