'शान्ति प्रक्रिया पूवंकीगु आशा याये'
यल (सन्ध्या टाइम्स)/ राष्ट्रपति डा. रामवरण यादवं दलतय्गु दथुइ जूगु न्यागू बुँदाया सहमतिपाखें शान्ति प्रक्रिया पूवंकी धकाः आशा यानादीगु दु। वय्कलं आःया अवस्थाय् नेपाःमि जनताया चाहना कथं न्हूगु संविधान दयेकेगु ज्या नं संविधानसभाय् दुथ्याःगु दलतय्सं याइ धकाः विश्वास यानादिल ।
थौं यलया पूच्वय् च्वंगु आरोग्य प्रतिष्ठानपाखें नेपालय् न्हापांखुसी मृगौला प्रत्यारोपण न्ह्यः परीक्षण याइगु एचएलए (ह्युमन लियुकोटविट एक्टिगन) या परीक्षण प्रयोगशालाया उलेज्या यानादिसें राष्ट्रपति यादवं थ्व खँ धयादीगु खः। वय्कलं राजनीतिक संक्रमणकालयात चीहाकः यानाः व्यवस्थापन यायेगु नापं विकासया न्ह्याकेत राजनीतिक दल, नागरिक समाज नापं आम नेपाःमि जनतायात आह्वान नं यानादिल ।
