'संकट टरे जूगु मखु सरे जूगु'
येँ (सन्ध्या टाइम्स)/ संविधानसभाया अध्यक्ष सुवास नेम्वाङं संविधान निर्माणया निंतिं थप जूगु स्वलाया ई धइगु संकट टरे जूगु मखु संकट सरे जक जूगु खः धयादीगु दु ।
थौं काभ्रेया बनेपाय् नेपाल बार एशोसिएशन केन्द्रीय कार्यकारणी परिषद्या ३६ क्वःगु मुँज्याया उलेज्या यानादिसें वय्कलं न्यागू बुँदाया सहमति बारे थवंथवय् आरोप प्रत्यारोप मयासे सहमति कार्यान्वय यायेगुपाखे दलत न्ह्याः वनेमाःगु बिचाः नं प्वंकादिल ।
वय्कलं धयादिल 'दलतसें सहमति कार्यान्वयन याये हे माः, इमिसं इन्कार याये मजिउ, छु सहमति यात उकियात लागू यायेमाः।' न्यागू बुँदाया सहमति कार्यान्वयनयात कयाः विवाद याये मजिउ धासें सभामुख नेम्वाङं धयादिल, 'सहमतिया विरुद्ध नेतातय्सं न्ववायेगु पायछि मखु। डुङ्गा डुबे जुल धाःसा सकलें डुबे जुइ ।'
