सिंहदरवार प्लाष्टिक झोला निषेधित क्षेत्र
येँ (सन्ध्या टाइम्स)/आः वइगु जेष्ठ २२ गते विश्व वातावरण दिवसया लसताय् सरकारं सिंहदरबार लागायात प्लाष्टिक झोला निषेधित क्षेत्र घोषणा यायेत्यंगु दु। सरकारं २० माइक्रोन स्वयां कमयागु प्लाष्टिक छ्यले मदइगु नियम हयेत्यंगु खः। वातावरण दिवस कुन्हु प्रधानमन्त्री झलनाथ खनालं सिंहदरबारयात प्लाष्टिक झोला मुक्त क्षेत्र घोषणा यानादी ।
न्हापांगु चरणय् सिंहदरबारयात प्लाष्टिक झोला मुक्त क्षेत्र घोषणा याइ धासें वातावरण मन्त्रालयया छगू उच्च स्रोतं छन्हुं हे औपचारिककथं मन्त्रिपरिषदं थुगु विषयया निर्णय मजुइगु खँ धाःगु दु। मन्त्रालयं वइगु स्वलाया दुने मुक्कं देय्यात हे प्लाष्टिक झोला मुक्त क्षेत्र घोषणा यायेगु थःपिनि योजना दुगु खँ नं धाःगु दु। मन्त्रालयं याकनं हे निर्देशिका दयेकाः देय्न्यंकं लागू यायेगु योजना दयेकूगु स्रोतं जानकारी बिउगु दु ।
थुगु इलय् बंगलादेशं थःगु देशयात प्लाष्टिक झोला मुक्त क्षेत्र घोषणा यायेधुंकूगु दु। २० माइक्रोन स्वयां कमगु प्लाष्टिकया प्रयोग यायेबलय् पुनः प्रयोगया निंतिं संकलन याये थाकुइगु, नष्ट याये नं थाकुइगु व वातावरणय् बांमलाःगु लिच्वः लाइगु जूगुलिं थुज्वःगु निर्णय याःगु स्रोतं जानकारी बिउगु दु। उगु निर्णयं बंगलादेशय् जुटया झोला छ्यलीपिं अप्वःगु खः ।
