राज्य पुनर्संरचनाया प्रतिवेदन विवाद

संविधान च्वयेगु ज्याया दकलय् महत्वपूर्ण पक्ष जुयाच्वंगु राज्य पुनर्संरचना सम्बन्धी प्रतिवेदनयात छलफलया लागिं संवैधानिक समितिइ पेश याःगु समाचार पिहां वःगु दु। तर उकियात अनावश्यक रुपं अति विवादित दयेकाः जक पेश याःगु कारणं राज्य पुनर्संरचना समितिया दुजः सभासद्त व जनजातित नं आक्रोशित जूगु दु ।

संविधानसभाया राज्य पुनर्स्थापना समितिं आपालं सहलह यानाः थःपिनि प्रतिवेदन पारित यानाछ्वःगु खः। गुलिखे बुँदाय् विवाद दुगु खःसां समितिया दुजःतय्सं उकियात सहलह व मतदानपाखें समाधान यानाः प्रतिवेदन तयार यानाः छ्वःगु खः। तर उगु प्रतिवेदनय् उल्लेख यानातः कथंया अवधारणा मयःपिं पुलांगु मानसिकताया मनूतय्सं प्रतिवेदनयात छलफलय् हे हया मबिल। राज्य पुनर्संरचना आयोग गठन यायेमानि धकाः ज्या पना बिल। खास यानाः थुकी कांग्रेस व एमालेया छगू अनुदारवादी गुटया तःधंगु ल्हाः दु। माओवादीं ल्वाभः त्वःतेगु ज्या चाहिं थौं हे यायेमाः, आः हे यायेमाः धाइपिं मनूतय्सं हे राज्य पुनर्संरचनाया ज्या चाहिं लिपा याःसां जिउ धकाः आयोग गठनया माग यानाच्वंगु खः। तर आः उपसमितिपाखें प्रतिवेदनयात संवैधानिक समितिइ पेश याःगु कारणं आयोग गठनया औचित्य मदया वंगु खँ प्रस्ट जुइ ।

अथे खःसां राज्य पुनर्संरचनायात विवादय् लाकाः थुकियात आःया स्वरुपय् हयेके हे मबीत प्रस्तावय् आपालं विवाद दु धकाः संविधान सभां पिनेया विवाद समेत ल्वाकछ्यानाः रिपोर्ट दयेकेगु ज्या जूगु दु। कमसेकम नं संविधानसभाया सकलें जनजाति सभासद् छप्पँ जुल धाःसा थ्व षडयन्त्रयात परास्त याये फइ ।

More Stories Like this