सहमतिया आधार दयेकाःजक राजीनामा

येँ (झीगु स्वनिगः)

नेकपा -एमालें) राष्ट्रिय सहमतिया आधार दये धुंकाः जक प्रधानमन्त्री झलनाथ खनालं राजीनामा बिइमाः धकाः धाःगु दु । पार्टीया केन्द्रीय ज्याकू बल्खुइ म्हिगः क्वचाःगु केन्द्रीय कमिटीया मुँज्यां खँ क्वःछ्यूगु खः । मुँज्याय् ब्वति कयादीपिं अप्वःयानाः नेतातय्सं राष्ट्रिय सहमतिया आधार तयार जुइ धुंकाः जक पार्टीया नायः प्रधानमन्त्री झलनाथ खनालं राजीनामा बिइमाः धकाः जोड बियादीगु खः । तत्कालिन अवस्थाय् एमालेया हे नेता माधव कुमार नेपाल प्रधानमन्त्री जुयाच्वंगु इलय् नं राजीनामा बियाः न्हय्ला/न्हय्ला तक सरकार दयेके मफुगु खँ न्ह्यथसें एमालेया नेतातय्सं आः नं अज्वःगु समस्या वइगु कथं राजीनामा बिइमजिउ धकाः धयादीगु खः ।

वर्तमान सरकार राजनीतिक ल्याखं कामचलाउ हे खः धासें मुँज्यां वइगु असारया स्वंगूगु वाः तकया दुने माओवादी लडाकुया पुनःस्थापना, समायोजनबारे खँ पूवंगु धकाः तकं निर्णय यायःगु दु । केन्द्रीय कमिटीया उगु मुँज्याय् नेतात ठाकुर गैरे, रामेश्वर फुयाल, अग्नी खरेल नापं मेमेपिन्सं न्वंवायेगु झ्वलय् न्यागू बुँदाया सहमतिया याकनं हे कार्यान्वयन यायेमाः धकाः धयादीगु खः । उगु मुँज्याय् स्वलाया दुने न्हूगु संविधानया मस्यौदा तयार यायेगु नितिं एमालें महत्वपूर्णगु भूमिका म्हितेमाः धकाः नं खँ जूगु खः ।