'राज्य पुनर्संरचनाया ज्यंकेमाःगु मूल मुद्दा स्वंगू जक खः’

येँ (झीगु स्वनिगः)

ता ई लिपा संविधानसभाया संवैधानिक समितिं अन्ततः म्हिगः विहिवाः राज्य पुनर्संरचनाया विवादित विषययात ज्यंकेगु नितिं उप समितिइ छलफल यानाः ज्यंकेगु नितिं छ्वःगु दु । संवैधानिक समितिया म्हिगः च्वंगु उप समितिया मुँज्यां अथे राज्य पुनर्संरचना समितिया प्रस्तावयात उप समितिइ छ्वःगु खः । आः राज्य पुनर्संरचनाया सवालय् ७८ गू बुँदा विवादास्पद दु धकाः अथे सहमतिया नितिं छ्वःगु खः । संविधानसभाया राज्य पुनर्संरचना नापं राज्य शक्ति बाँडफाँट समितिया सभपाति लोकेन्द्र विष्ट मगरं 'झीगु स्वनिगः'लिसे खँ ल्हासें समितिया प्रतिवेदनय् मूल रुपं बहुमतं पारित यानागु स्वंगू जक मूल मुद्दा दुगु अले मेमेगु धैगु समस्या हे मखु धकाः धयादिल ।

फुक्क धैथें सर्व सहमतिं पारित जूगु तर प्रदेशया ल्याः, राजनीतिक अग्राधिकार व स्वायत्त क्षेत्र तयेगु ला कि मतयेगु धैगु स्वंगू विषसं जक बहुमतं पारित यानागु जुयाः व हे स्वंगू मूल मुद्दा खः मेमेगु धैगु म्वाः मदुसां विवादित मुद्दा धकाः राज्य पुनर्संरचना समिितया सभापति विष्टं धयादिल । वय्कलं मेमेगु विषय अःपुक हे सहमति जुइ धकाः नं दावी यानादिल । न्हूगु संविधानया च्वयेगु नितिं महत्वपुर्णगु विषय जुयाच्वंगु राज्यया पुनर्संरचनाया विषसं नं संवैधानिक समिति अन्तर्गतया उप समितिइ सहलह जुइगु जुयाः नेपाःया आदिवासी जनजाति नापं नेवाःतय्सं च्यूताः तयाहःगु दु । अथे हे निर्वाचन प्रणालीया विषयसं नं विवादित जुयाच्वंगु खँय् सहमति ब्वलंकेत उप समितिइ छ्वःगु दु ।