'सशस्त्र पुचःतलिसे निणर्यक वार्ता’

येँ (झीगु स्वनिगः)

झलनाथ खनालं नेतृत्व यानादीगु वर्तमान सरकारया शान्ति नापं पुनः निर्माण मन्त्री विश्वनाथ साह नं थौं कन्हय् सशस्त्र पुचःतलिसे आः निणर्ायक वार्ता यायेगु जुइ धकाः धयादीगु दु । नेपाःया मधेस तराई लागा व पहाडी लागाय् थीथी पुचःया नामं सशस्त्र कथं गतिविधि न्ह्याकाच्वंगु पुचःतलिसे वार्ता यायेगु नितिं माःगु कथं पौ तकं छ्वये धुन धकाः वय्कलं धयादीगु दु । नेपाल पत्रकार महासंघ सिराहापाखें म्हिगः विहिवाः अनया गोलबजारय् याःगु पत्रकार सम्मेलनय् मन्त्री साह नं अथे धयादीगु खः ।

शान्ति मन्त्री साह नं धयादिल 'जिमिसं सशस्त्र पुचःतय्त पौ हे छ्वयाः वार्ताया नितिं आह्वान याये धुनागु दु ।' वय्कलं न्हापाया सरकारं सशस्त्र पुचःतलिसे याःगु वार्ता ठोस निष्कर्षय् मथ्यंगु खँ न्ह्यथसें आः धाःसा निणर्यक वार्ता यायेगु जुइ धकाः नं धयादिल । राष्ट्रिय सहमति मजुइकं प्रधानमन्त्री झलनाथ खनालया राजीनामा फ्वनेगु धैगु शान्ति प्रक्रियायात बेवास्ता यायेगु खः धयादिसें मन्त्री साह नं धयादिल 'स्वलाया दुने सेना समायोजन यायेगु, संविधानया मोडल तयार यानाः जनतायाथाय् यंकेगु ज्या जुइ ।' शान्ति मन्त्री विश्वनाथ साह नं भारत व चीन नाप नं नेपाःया बांलाःगु स्वापू दुगु नापं दयाः च्वनेमाःगु खँ न्ह्यथसें बास्तवय् संघीय गणतन्त्रया न्हूगु संविधान दयेकेगु ज्या नेपाःमि जनतां हे याइ धकाः नं स्पष्ट यानादिल ।