बल्ल न्ह्यात राज्य पुनर्संरचना

'षडयन्त्रमुलक कथं राज्य पुनर्संरचना विवादय् लाकल'

येँ (सन्ध्या टाइम्स)/न्हूगु संविधान निर्माणया निंतिं दलतय्गु दथुइ विवाद जुयाच्वंगु विषय ज्यंकेत संविधानसभाया संवैधानिक समिति अन्तर्गत दयेकूगु उपसमितिइ बल्ल थौं राज्य पुनर्संरचना नापं राज्य शक्ति बाँडफाँड समितिया प्रतिवेदन छलफलया नितिं छ्वःगु दु ।

संवैधानिक समितिइ तःक्वःमछि सहलह ब्याकूसां सहमति जुइ मफुगुलिं थौं च्वंगु संवैधानिक समितिया मुँज्यां उगु प्रतिवेदनयात उपसमितिइ छ्वःगु खः। न्हूगु संविधान निर्माणया नितिं महत्वपूर्णगु विषय जुयाच्वंगु राज्य पुनर्संरचनाया प्रतिवेदन छलफलया नितिं ला छ्वल तर संविधानसभाया राज्य पुनर्संरचना समितिइ सर्वसम्मतिं पारित जूगु विषययात तकं विवादित विषय धकाः छ्वःगुलिं आदिवासी जनजातिया न्ह्यलुवा नापं सांसद्त अजूचाःगु दु। थुकी राज्य पुनर्संरचनाया सवालय् ७८ गू विषयय् विवाद जुयाच्वंगु दु धकाः धलः दयेकाः छ्वःगु खः। आः थ्वहे विवादित विषय धाःगु बुँदाय् हे उपसमितिइ सहलह जुइ ।

संविधानसभा अन्तर्गत राज्य पुनर्संरचना समितिया दुजः डा. मंगलसिद्धि मानन्धरं 'सन्ध्या टाइम्स' लिसे खँल्हासें वास्तवय् थःपिनि समितिं अवधारणापत्र सर्वसम्मतिं पारित जूगु खः धकाः धयादिल। वय्कलं प्रदेशया ल्याः व नां नापं राजनीतिक अग्राधिकारया बारे जक बहुमतं पारित यानागु खः, उकिं म्वाः मदुगु कथं विवाद हे मजूगु विषययात तकं विवादित विषय यानाः हःगु खनाः अजूचायादीगु दु ।

अथे हे आदिवासी जनजातिया न्ह्यलुवा समाजशास्त्री डा. कृष्णबहादुर भट्टचनं वास्तवय् षडयन्त्रमुलक कथं हे विवाद मजूगु विषययात नं विवादित धकाः हःगुलिं आः आदिवासी जनजाति सभासद्त सुंक च्वनाच्वने मजिउ धकाः धयादीगु दु ।

सूत्रं बिउगु जानकारी कथं एमालेया नेता अग्नी खरेलया नेतृत्वय् तत्कालिन अवस्थाय् छगू कार्यदल दयेकूगु अले वहे कार्यदलं राज्य पुनर्संरचनाया सवालय् विवाद हे मजूगु विषययात तकं विवादित धकाः धलः दयेकेगु ज्या याःगु नापं लिपा संविधानसभाया सचिवालयपाखें संवैधानिक समितिइ छ्वःगु खः धकाः धाःगु दु ।