प्रचण्ड वालुवाटारय्, खनाल कोइराला निवासय्
येँ (सन्ध्या टाइम्स)/न्यागू बुँदे सहमतियात कार्यान्वयन यायेगु निंतिं प्रधानमन्त्री झलनाथ खनाल सक्रिय जुयादीगु दु। उकिया निंतिं थौं खनालं माओवादी अध्यक्ष प्रचण्ड व कांग्रेसया सभापति सुशील कोइरालायात नापलानाः सहलह ब्याकादीगु खः। प्रधानमन्त्री खनालयात नापलायेत थौं सुथय् प्रचण्ड प्रधानमन्त्री निवास वालुवाटारय् वंगु खः ।
अथे हे खनालं कांग्रेस सभापति कोइरालायात नाप लायेत वय्कःया हे निवास महाराजगञ्जय् वंगु खः। निम्हं हे नेतातलिसे नापलायेगु झ्वलय् प्रधानमन्त्री खनालं स्वंगू दलया सहमति कथं तयार जुयाः संविधानसभां तकं अनुमोदन याःगु न्यागू बुँदाया सहमति कार्यान्वयन यायेगु बारे सहलह ब्याकादीगु खः। सहलहया झ्वलय् कोइरालां न्यागू बुँदाया सहमति कार्यान्वयन यायेगु निंतिं प्रधानमन्त्रीं राजीनामा मबिल धकाः आलोचना यानादीगु खःसा लिसलय् प्रम खनालं राष्ट्रिय सहमति जुल धाःसा वयां लिपा थः एक मिनेट नं च्वनेगु जुइ मखु धयादीगु खः ।
न्यागू बुँदाया सहमति जुइधुंकाः प्रधानमन्त्री खनालं माओवादी अध्यक्ष प्रचण्डयात नापलानादीगु थ्व निक्वःखुसी खःसा कांग्रेस सभापति कोइरालायात नापलानादीगु धाःसा न्हापांखुसी खः ।
