मन्त्री विरुद्ध बेलायती मानव अधिकारवादीया पौ
येँ (सन्ध्या टाइम्स)/बेलायतया बार ह्युमन राइट्स् कमिटी अफ इंग्ल्यान्ड व वेल्सं मानव अधिकार उल्लंघनया द्वपं लानाच्वंम्ह संचारमन्त्री लिसें एकीकृत माओवादीया नेता अग्नी सापकोटायात कारवाही यायेत माग याःगु दु।
बार ह्युमन राइट्स् कमिटीया अध्यक्ष मार्क मुलरं प्रधानमन्त्री झलनाथ खनालयात खुल्ला पौ च्वसें काभ्रेया अर्जुन लामाया हत्याय् संचारमन्त्री नापं माओवादी नेता सापकोटाया प्रत्यक्ष संलग्नता दुगु खँयात कयाः गम्भीर रुपं आपत्ति प्वंकूगु खः ।
पती माधव अधिकार उल्लंघनय् स्वापू दुम्ह मनूयात मन्त्री दयेकल धकाः न्ह्यथँसें घटनाया निष्पक्ष छानविन यानाः दोषयात कडा सजाय व पीडितयात क्षतिपूर्ति बीत माग याःगु दु ।
खुदँ न्ह्यः माओवादी कार्यकर्तातय्सं लामायात अपहरण याःगु व सापकोटाया हे निर्देशन कथं लामाया हत्या जूगु खँ थीथी प्रतिवेदनय् उल्लेख जुयाच्वंगु दावी नं उगु पती यानातःगु दु ।
महान्यायाधिवक्ता युवराज संग्रौला, राष्ट्रिय मानअधिकार आयोग अध्यक्ष केदारनाथ उपाध्याय, बेलायतया नितिं नेपाःया राजदूत डा. सुरेश चालिसे व नेपालय् च्वंगु बेलायती राजदूत जोन टकनटयात बोधार्थ यासें पती दण्डहिनताया संस्कार अन्त्य यानाः सर्वसाधारणयात कानुनी राजया प्रत्याभूति बीत ध्यानाकर्षण यानातःगु दु।
मन्त्री सापकोटायात २०६२ बैशाख १६ गते काभ्रेया छत्रबाँझ स्थित कृष्ण माध्यामिक विद्यालय लागाय् स्थानीय अर्जुन लामायात अपहरण यानाः हत्या याःगु अभियोग बियातःगु दु ।
स्कूलया ज्याझ्वलय् ब्वति कयाच्वंगु इलय् अपहरणय् लाःम्ह लामायात स्वला लिपा काभ्रेया बुढाखानी गाविसय् हत्या याःगु धकाः अभियोग तयातःगु दु ।
