मोति पत्रकारिता सिरपाः बीगु
यल (सन्ध्या टाइम्स)/नेवाः प्रेस दबू नेपाःया ग्वसालय् वइगु शनिवाः दबूया स्वक्वःगु दँमुँज्या न्यायेकीगु जूगु दु। यलया बार एशोसियशनया हलय् जुइत्यंगु उगु ज्याझ्वलय् स्वनिगःया नेपालभाषा व संस्कृतिइ विशेष योगदान यानादीपिं स्वम्ह भाषासेवी व्यक्तित्वपिंत हनीगु नं ज्याझ्वः दु। ग्वसाः खलःया धापूकथं ज्याझ्वलय् येँ लागां रेडियो नेपालया स्थापना कालंनिसें नेपालभाषां समाचार वाचन व सम्पादन यानादीम्ह भाजु हरि श्रेष्ठ, यल लागाया नांजाःगु धार्मिक प्याखं कार्तिक प्याखंया प्रबन्ध समितिया व्यवस्थापक निर्देशक हरिमान श्रेष्ठ व ख्वप लागां नेपालभाषाया अन्वेषक एवं व्याकरणविद् भाजु रमापतिराज शर्मापिंत हनीगु नं ज्याझ्वः दु ।
थुकियालिसें नेवाः प्रेस दबूया दँमुँज्याया हे दथुइ थुगु दँया 'मोति पत्रकारिता पुरस्कार' नं लःल्हाइगु ज्याझ्वः दु। उगु मोति पत्रकारिता सिरपाः सुयात लःल्हाइ धयागु खँ धाःसा सार्वजनिक याःगु मदुनि। नां वकुन्हु हे घोषणा याइ ।
