जेठ १८ व थौंया मानसिकता

नेपाःया आदिवासी जनजातितय्सं दँय्दसं न्यायेका वयाच्वंगु जेठ १८ गतेया हाकुगु न्हि थुगुसी देशय् ब्वलंगु अनेक राजनीतिक अन्यौलं यानाः न्हापा थें तःधंक हने मखन। खतुं हाकुगु न्हियात सदां वहे कथं सराद्धे याये थें हनाच्वनेमाः धइगु मदु। हाकुगु न्हिया हे 'स्पिरिट'यात ज्वनाः नेवाः लगायत देय्या थीथी आदिवासी जनजातितय् थौंकन्हय् न्हिंन्हिं हे धइथें लगातार ज्याझ्वःत यानाच्वंगु दु। थज्याःगु अवस्थाय् हाकुगु न्हिया लागिं जक धकाः हानं बिस्कं ज्याझ्वः याये हे माः धइगु नं मदु। वास्तवय् हाकुगु न्हि छगू प्रतीक जक खः, प्रजातान्त्रिक धाःगु इलय् तक नं देय्या आदिवासी जनजातितय्त राज्यं गुलि तक शोषण यानाच्वंगु दु धइगु खँया। नेपालय् ब्रम्हूवादी मानसिकता संसद व सरकारय् जक मखु न्यायालयय् तकं दु धइगु खँया व छगू ज्वलन्त दसि खः। उगु न्हियात जनजातितय्सं लिपा लिपा तकं लुमंकाच्वंगुया अर्थ आः जुइगु परिवर्तन अज्याःगु मानसिकतां मुक्त जुइमा धकाः खः। वास्तवय् सर्वोच्च अदालतं जनजातिया भाषायात स्थानीय निकायय् तक नं छ्यले दइ मखु धकाः फैसला याना बीधुंकाः हे तिनि सकलें जनजातितय्सं आः झीगु लागिं थ्व व्यवस्था मजिल, जातीय आधारय् निर्माण जुइगु संघीय व्यवस्था हे माः धकाः निर्णय याःगु खः। थ्व ल्याखं आदिवासी जनजातिया बिचाःयात न्हूगु मोड बिउगु छगू कोशल्वहंया रुपय् जेठ १८ या न्हियात कायेमाः। थौंकन्हय् राज्य पुनर्संरचनाया सवालय् जुयाच्वंगु कचवं व विवाद स्वयेगु खःसा देशय् थपाय्धंगु हिउपाः वयेधुंकाः नं जेठ १८ या हाकुगु मानसिकतां मुलुक मुक्त मजूनि धइगु स्पष्ट हे क्यनाच्वंगु दु ।

More Stories Like this