वास्तवय् बुद्ध गज्याःम्ह खः?

जुजुभाइ शाक्य

थ्व भवसागरय् च्वनाच्वंपिं गुलि नं दु उकी मध्ये विभिन्न धर्म अनुशरण यानाच्वंपिं आपालं हे दु। थुपिं सकलया सिद्धान्त छगू हे जक खः। व खः शुद्ध, शान्त, चित्तया नापं थःगु जीवन हना वनेगु।थ्व सिद्धान्त शाक्यमुनि भगवान बुद्धं अनुभव याना वनेफु धयागु झी साधारण मानवप्रित थीथी माध्यमं धयाबिज्याःगु दु। व थें तुं भगवान बुद्धं यथावादी तथाकारी जुयाः थः शुद्ध जुयाः मेपिं नं उलि हे शुद्ध जुइ फयेमा धयागु ज्ञान कयाबिज्याःगु दु। व थें तुं भगवान बुद्धं थः शान्त जुयाः सकल मानवपिं नं शान्त जुयाः च्वनेफु धइगु क्यनाबिज्याःगु दु। हाकनं थःगु अन्तर मनया स्वभाव शान्त, शुद्ध जुइफु धकाः नं क्यनाबिज्याःगु दु। थः दाः हे वःसां वयात शान्त जुइगु उपाय क्यनाः शुद्धताया शान्त चित्तं च्वने फइगु ज्ञान कनाबिज्याःगु दु। थःत ब्वः बिउ वःसां वयात वयागु अज्ञानतां ब्वः बिउ वःगु धयागु न्हाय्कनय् खने थें पञ्चशीलया माध्यमं कनाबिज्याःगु दु। अष्टशीलया माध्यमं क्यनाबिज्याःगु दु। न्यागू ज्ञानया आधारं कनाबिज्याःगु दु ।

समता ज्ञानं सकल मानवतय्त समानतां स्वये सयेकेमाः। समता ज्ञान शील धाःसा प्रत्येक ज्ञान खनी। प्रत्यक्ष ज्ञान धाःसा, आदर्श ज्ञान जुइ। आदर्श ज्ञान बांलाक थुल धाःसा अःपुक हे कृत्यानुस्थान ज्ञान हासिल जुइ। थुकथं भगवान बुद्धया सिद्धान्तया ज्ञान दइ। थुकिया आधारं हे थौंया कथा वाचन जुयाच्वन। प्रार्थना यानाच्वन। बुद्ध वचनया दर्शनत देशना यानाच्वन। उपासक-उपासिकापिं धारण यानाच्वन। तर दैनिक व्यवहारिक पसेनान्य पात्रय् जक खनाच्वना। थ्व हे बौद्ध दर्शनयात व्यावहारिक पक्षय् ज्ञान आर्जन याये फयेमा धकाः बुद्ध जयन्ती २५५५ क्वःगु दँ तक नं बुद्ध धर्म सम्बन्धी भजनया बारे थःपिं व मेपिंत प्रभाव यायेगु जुयाच्वंगु दु। गथे कि म्येँय् नं थ्व भाव प्रकट यानाच्वंगु दु। गथेकि 'झ्यालं नं फय् वयाः मत जक सित यःमां झ्याः तिइगु गय्, यः मां झ्याः तिइगु गय्'। भगवान बुद्धयागु अनेक ज्ञान झीसं थुइकाच्वना तर न्ह्याक्व थूसां व्यवहारय् छ्यले उलि हे थाकुयाच्वन। व्यवहारय् छ्यले मफुतले आदर्शज्ञान ल्वःमनाच्वन। लुमंका तःसां, तना वन। व्यवहारय् छ्यलाबुला याये मफयाच्वन। व थें तुं हिंसा याये मखु, प्राणीयात गबलें स्यंकेगु ज्या याये मखु , व्यभिचारी याये मखु, स्याये मखु, नुगलय् स्याके मखु, तं पिकाये मखु, लोभ याये मखु, मन्यँसे काये मखु, खुयाः काये मखु, लँय् लुया वःगु सामान सम्बन्धित मनूयात बी यंकेगु आचरण यायेगु जुल धयागु वचनबद्ध जूसां समाजय् लागू याये मफयाच्वंगु दु। गथे कि खुया काये मखु धयागु प्रण याःसां नं वयात खुया कायेत बाध्य यानाच्वंगु दु। मबीकं काये मखु धकाः वचन बिउसां बाध्य जुयाच्वनीगु थुज्वःगु पटक-पटक यानाच्वंगु दु ।

थ्व समाजया कलंक जुयाच्वंगु दु। समाज समाजय् जक सीमित जुयाच्वने माःगु दु। थुज्वःगु कलंक वांछ्वयाः निष्कलंक जुइ सयेकेगु व जुइगुया निंतिं झी सकलयात बोध यायेगु निंतिं मनय् थ्यंक सिचुक बांलाःगु संगीतया नापनापं बुद्धया सिद्धान्त शुद्ध आचरणया भाव संगीतया माध्यमं प्रभावित यायेगु निंतिं ज्ञानया माला गुणया माला क्वखाया जुइगु दिं स्वांया पुन्हि बुद्ध जयन्तीया महान् दिनय् भजन यानाः माने यानाच्वन। थ्व छाय् यात धाःसा वकुन्हु छन्हु जक छाय् मजुइमा बौद्ध अनुयायीतय्सं आनन्द प्राप्त यानाच्वनी। न्ह्यागु धर्मया मूल सिद्धान्त नं आनन्दं च्वने सयेकि, शुद्धं जुइ सयेकि, चित्त शान्त याये फयेकि, सुम्क च्वने सयेकि, दीन-दुःखीपिंत उद्धार याये सयेकि, छेँया पीर मर्का त्वःताः सुख व आनन्दया मार्ग अबलम्बन याये सयेकि धइगु हे खः। थुगु तरिकां बुद्ध लुमंकाः बुद्धया मार्ग म्हसीकेगु नं मनूया आज्जु जुइमाः। थुगु तरिकां नं बुद्धयात म्हसीकेगु मार्ग खः। शुद्ध, चित्त, आनन्द रुपं च्वना स्वल धाःसा अति हे आनन्द प्राप्त जू। थ्व आनन्द झीसं थौंया भौतिक शरीरं यायेफु। पत्याः मजूसा याना स्व, अवस्य नं प्राप्त जुइ। सुयां ग्वाहालि म्वाः। थुकियात नित्य अभ्यास याना वन धाःसा बुद्धया मार्ग खनी। बुद्धया रंग शान्त मूर्ति म्हसीकेत थः सक्षम जुइ। थुलि निं याना स्व, मेगु अथें थुया वइ, सया वइ ।

More Stories Like this