'राजीनामाय् जिगु रुची मदु'

येँ (सन्ध्या टाइम्स)/नेपाली कांग्रेसया सभापति सुशील कोइरालां थःत प्रधानमन्त्री झलनाथ खनालं राजीनामा बी लाकि बी मखु धइगु खँय् 'इन्टरेष्ट' मदुगु खँ कनादीगु दु।
वय्कलं धयादीगु दु, 'राजीनामा बी धकाः वय्कलं प्रतिवद्धता प्वंकादीगु दु उकिं बी जुइ। तर थ्व जिगु रुचीया विषय मखु। जिगु ध्यान ला आः पूर्ण रुपं शान्ति प्रक्रियाय् हे दु।'
म्हिगः बीबीसी नेपाली सेवालिसे खँ ल्हासें वय्कलं थ्व बिचाः प्वंकादीगु खः ।

म्हिगः हे प्रधानमन्त्री झलनाथ खनालं राष्ट्रया नामय् संवोधन यासें थम्हं तुरुन्त राजीनामा मबीगु संकेत बियादीगु खः। प्रमया संवोधनयात कयाः कोइरालां टिप्पणी यानादिल, 'थ्व यानाच्वनेमाःगु संवोधन हे मखु। खुरुखुरु सहमति कथंया ज्या ज्याना छ्वःसा जिउगु खः ।'

शान्ति प्रक्रिया हे थःगु प्रमुख एजेण्डा जूगु कारणं शान्ति प्रक्रिया पूवंके धुंकाः प्रचण्ड हे प्रधानमन्त्री जूवःसां थःपिंसं स्वीकार यायेगु खँ नं सभापति कोइरालां कनादिल। वय्कलं धयादिल, 'शान्ति प्रक्रिया पूवंकि, अले ला प्रचण्ड हे (प्रधानमन्त्री) जूसां फरक जुइ मखु ।'

माओवादीं ल्वाभः बुझे याये हे माः धकाः छवाः न्ह्यः तक अडान कयादीम्ह कोइरालां अन्तिमय् उगु अडान त्वःतूगु बारे न्यंगु छगू न्ह्यसःयात कयाः वय्कलं धयादिल, 'स्थिति तसकं जटिल दु, अथे ला जूवनेफु नि स्वयादिसँ। जि छम्ह प्रजातन्त्रवादी मनू खः, उकिं जिं माओवादीं थें हठ क्यनेगु मिले नं मजू ।'

स्वलाया दुने शान्ति प्रक्रिया पूवंकेगु धकाः न्यागू बुँदाया सहमति जूगु दु, उकी थः तसकं आशावादी जुयागु खँ कँसें वय्कलं राजीनामा नं वहे इलय् वइ जुइ धयादिल ।

सिटौलां यानाः आपत
सभापति सुशील कोइरालां मनोनित यानादीम्ह महामन्त्री कृष्णप्रसाद सिटौलां थुगुसी संविधानसभाया म्याद थपे मयायेगु लागिं म्हितूगु भूमिकां यानाः सभापति कोइरालायात तकं तःधंगु आपत वल। कोइरालां माओवादीयात ख्यायेत जक संविधानसभा विघटन जूसां थजु धयादीगु जुयाच्वन। तर सिटौला ला धाथें विघटन हे यायेत सुरे जुइवं रामचन्द्र पौडेल, डा. रामशरण महत आदिपिंसं कोइरालायात 'छिगु नियत छु?' धकाः समेत ख्वाख्वात्याःगु खः। वयां लिपा कोइराला बैठक हे वनेगु समेत त्वःतादीगु खः ।