संविधान च्वयेत सभामुखया सक्रियता
संविधानसभाया म्याद स्वला थपे यायेगु ज्या जुइवं सभामुख सुभाष नेम्बाङं संविधान च्वयेगु ज्यायात न्ह्यःने न्ह्याकेगु तयारी नं शुरु यानादीगु दु। उकिया लागिं वय्कलं म्हिगः छगू विशेष बैठक सःताः निलाया दुने हे संविधानया प्रारम्भिक मस्यौदा तयार यायेगु धकाः सहमति ब्याकादीगु दु। सभामुख नेम्बाङया थ्व तत्परता च्वछायेबहः जू। विगतय् राजनीतिक पार्टीत सत्ता केन्द्रित गतिविधिइ जक अप्वः तक्यनाच्वंगु इलय् संविधान च्वयेगु ज्या अथें थाति लाःगु व उगु अवस्थाय् नं सभामुख धाःसा शक्ति दयां नं केवल मुकदर्शक जक जुयाच्वन धइगु आरोप वःगु खः। अज्याःगु आरोपपाखें बचे जुइगु लागिं नं वय्कलं संविधान च्वयेगु ज्यायात न्ह्यःने न्ह्याकेगु लागिं पहल यायेमाःगु खनेदु ।
स्वंगू तःधंगु दलतय् दथुइ जूगु सहमति कथं संविधानसभापाखें आः वइगु स्वलाया दुने संविधानया मस्यौदा तयार यायेगु खँ दु। तर मस्यौदा दयेकेगु लागिं तःधंगु दलत हे पंगः जुयाच्वंगु दु। खास यानाः नेपाली कांग्रेसं राज्य पुनर्संरचना सम्बन्धी थःपिनि अवधारणा आः तकं पेश मयाःनिगु कारणं संविधानया मुख्य विवाद समाधान यायेत समस्या जुयाच्वंगु दु। उकिं दकलय् न्हापां कांग्रेस लगायतया दलतय्सं थःपिनि आधिकारिक धारणा संविधानसभाया सम्बन्धित समितिइ बुझे याये माल। यदि बुझे मयात धाःसा मेगु दलतय्सं गथे बुझे याःगु खः उकियात हे स्वीकार याना वनेगु जुइ धकाः सभामुखं रुलिङ याना बीमाल। यदि संविधान च्वयेगु ज्या मतापं न्ह्यानावन व च्वज्या सिधल धाःसा उकिं ढिला जुयाच्वंगु शान्ति प्रक्रियायात नं दवाव लाः वनी। थ्व ज्याय् आः सभामुख धाथें हे सभामुख जुयाः सक्रिय जुइमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
