थौं जेठ १८ हाकुगु न्हि
येँ (सन्ध्या टाइम्स)/नेपाःया अदिवासी जनजातिय्सं दँय्दसं थौंया दिं जेठ १८ गतेयात हाकुगु न्हि कथं हना वयाच्वंसां थुगुसी धाःसा छुं नं औपचारिक ज्याझ्वः मयात।
२०५६ जेठ १८ गते सर्वोच्च अदालतं येँ मनपाय् नेवाः भाय् व धनुषा जिविसय् मैथिली भाय् छ्यले मदु धकाः याःगु फैसलाया विरोधय् दँय्दसं जेठ १८ यात हाकुगु न्हि कथं हना वयाच्वंगु दु ।
थ्वहे झ्वलय् नेवाः स्वायत्त राज्य मंकाः संघर्ष समिति व नेवाः देय् दबूपाखें विज्ञप्ति पिथँसें भाषिक अधिकार नापं जातीय स्वायत्तता व स्वशासनया नितिं न्ह्याः वनेत बः बिउगु दु। संघर्ष समितिया वक्तव्यय् भाषिक समान अधिकार लगायत जनजातिया फुक्क अधिकार सुनिश्चितत यायेत संघर्षयात अझ प्रभावकारी ढंगं न्ह्याकेमाः धयातःगु दु। नेवाः देय् दबूया विज्ञप्तिइ हाकुगु न्हि लुमंकुसें संघीय गणतन्त्र नेपाःया केन्द्रय् नेपाःया फुक्क मातृभाषायात सरकारी ज्याखँया मान्यता बीमाः धकाः माग यानातःगु दु ।
