प्रचण्डया कायं सगरमाथा गइगु हे जुल

येँ (सन्ध्या टाइम्स)/माओवादी अध्यक्ष प्रचण्डया कायभाजु प्रकाशं म्हीग छगू ज्याझ्वलय् आः थःपिंसं नं सगरमाथा आरोहण याये धकाः घोषणा याःबलय् मनूतय्सं उकियात ख्याः जक तायेकूगु खः। तर प्रचण्डपुत्र प्रकाशं धाःसा उकियात ख्याः मखु धाथें साबित यायेत आकिवंनिसें तालिम समेत शुरु यायेगु खँ टाइम्स अफ इण्डिया अनलाइनयात कनादीगु दु ।

माओवादीया पार्टीगत आरोहण पुचः हे दयेकाः प्रकाश लिसें ब्रिगेडियर कमाण्डर युवराज दुलाल व विद्यार्थी नेता कृष्ण केसीया टीम समेत तयार जुइधुंकूगु खँ वय्कलं कनादीगु दु ।

आःयात चिचीजाःगु हिमाल गयाः तालिम शुरु यासें सन् २०१२ या सिजनय् सगरमाथा आरोहण हे यायेगु थ्व पुचःया आज्जु दुगु खँ नं २९ दँया भाजु प्रकाशं कनादिल।
आरोहणया लागिं परिवारपाखें स्वीकृति नं वयेधुंकूगु खँ कँसें प्रकाशं धयादिल, 'आरोहणय् यक्व खतरा ला दु, जिमिसं जनयुद्धया इलय् यक्व हे खतरा फया वयेधुन। थ्व खतरा छुं तःधंगु खँ मखु ।'

प्रकाश दाहाल ब्याडमिन्टनया बांलाःम्ह कासामि खः। वय्कलं थः बौ प्रचण्डयात नं ब्याडमिन्टन व मेमेगु शारीरिक ब्यायाम स्यनादीगु दु। माओवादीं जनयुद्ध शुरु याःगु इलय् प्रकाश येँया हे छगू स्कूलय् ८ कक्षा ब्वनाच्वंगु जुयाच्वन। प्रहरीं उगु स्कूलय् दाहाल थरयापिं मस्त माः वयेवं स्कूल त्वःताः वय्कःयात भारतया जालन्धर यंकूगु खः ।

न्हापांम्ह सगरमाथा आरोही तेन्जिङ शेर्पायात थःगु आदर्श तायेकीम्ह दाहालं धाल, 'सगरमाथा गयेगु जिगु मचांनिसेंया इच्छा खः। आः व इच्छा पूवंकेगु कुतलय् वनेत्यनागु दु।' तालिम गन जुइ व सुनां बी धइगु खँ धाःसा निश्चित मयाःनि ।