हुसेनया नां नं हिल, पार्टनर नं हिल
येँ (सन्ध्या टाइम्स)/म्हिगः तिनि जिल्ला अदालतं सफाइ काःम्ह समलिंगी ट्राफिक रमिना हुसेनं आः हानं मेम्ह हे समलिंगी पार्टनर लुइकूगु दु। वय्कःया आःयाम्ह पार्टनर धाःसा पत्रकारखः। न्हापा थःहे म्ह्याय्चा लाःम्ह १७ दँया पूजन बस्नेतयात पार्टनर दयेकल धकाः वय्कःयात ट्राफिक जागिरं हे खोसे याःगु खः। उकियात कयाः वय्कलं मुद्दा तःगु खःसा म्हिगः अदालतं वय्कःया पक्षय् फैसला न्यंकुसें समलिंगी जुइगु अपराध मखुगुलिं वय्कःयात पुनर्वहाली याके बिउगु खः ।
रमिना हुसेनं आः थःगु नां हिलाः राज हुसेन तःगु दु। वय्कःया न्हूम्ह पार्टनर पोखराया मिसाम्ह पत्रकार खः गुम्ह थौंकन्हय् येँय् दृश्य संचार विषयय् तालिम कयाच्वंगु दु। थौंकन्हय् रमिना (राज) व मिसाम्ह पत्रकार छगू हे क्वथाय् नापं च्वनाच्वंगु दु ।
उखे रमिनाया पक्षय् अदालतं याःगु फैसलायात ब्लु डायमण्ड सोसाइटीया नायः लिसें सभासद् सुनिलबाबु पन्तं लसकुस यानादीगु दु। 'सन्ध्या टाइम्स' यात वय्कलं धयादिल, 'फैसलां देशय् न्याय याइपिं अझ नं दनि धइगु अनुभूति जूगु दु ।'
