पोस्टर विरोधी सकारात्मक 'पल'

विजयरत्न असंबर

'सोच', 'खोज' व म गर्न सक्छु' थेंज्याःगु स्वंगू सकारात्मक बिचाः इनीगु सफू च्वयेधुंकूम्ह पर्यटन व्यवसायी कर्ण शाक्य आः थःगु बिचाःयात फिल्मया माध्यमं मनूतय् दथुइ यंकेगु कुतलय् दी। फिल्मया माध्यमं सकारात्मक सोच संचार यायेगु तातुनाः दयेकूगु न्हूगु फिल्म "पल"या च्वमि जक मखुसें निर्माता नं खः, कर्ण शाक्य ।

जीवनया यथार्थ जक पर्दाय् न्ह्यब्वयेगु तातुनाः दयेकूगु "पल" फिल्मय् फसय् ब्वयाः ल्वाइगु दृश्यत मदु। अले सिमा वा क्यबय् हुलीगु हुलाप्याखं नं मदु। छगू परिवारया जीवनय् नकारात्मक बिचाः व सकारात्मक बिचारं लाकीगु प्रभावयात क्यनातःगु थ्व फिल्मय् हाफ टाइम न्ह्यःया घटना दक्वं नेगेटिभ सोचं न्ह्याइ। उकिया लिच्वः नं नेगेटिभ हे जुइ। वहे पात्र अले वहे परिवेश ज्वनाः हाफ टाइम लिपा वहे बाखं हानं सकारात्मक सोच ज्वनाः न्ह्याइ। लिच्वः नं पोजेटिभ हे जुइ। छपु हे बाखंयात निगू बिस्कं बिस्कं परिवेशय् ब्वयातःगु "पल" स्वयेबलय् छपाः टिकटं निगू फिल्म स्वयाच्वनागु थें नं जुइफु। तर थ्व छगू हे फिल्म खः ।

मेमेगु फिल्मय् थें हे तुं थुकी नं भिंम्ह व मभिंम्ह दथुया ल्वापु दु। अले भिंम्हेसिया भिं हे जुइगु लिच्वः नं दु। केवल ब्वयातःगु शैली जक पाः। थुकथं स्वयेबलय् थ्व छगू प्रयोगात्मक फिल्म धकाः धायेमाः। थुकी जुयाच्वंगु प्रयोगं थौंया शिक्षित समाजया नुगः याउँक हे त्याके फइगु खनेदु। कमर्शियल फिल्म धकाः लाथेपाथे दयेकीगु प्याखंयात "पल" फिल्मं हाथ्या बिउगु दु। फिल्म स्वइपिं गरीब श्रमिक वर्ग जक खः अले इमित 'चिप इन्टरटेन्टमेन्ट' माः धकाः फिल्म दयेकीपिं निर्देशकतय्त "पल" छगू लिसः खः ।

विशेष यानाः थ्व छगू सकारात्मक सन्देश ह्वलीगु फिल्म खः। कर्ण शाक्यया धापू कथं मनूतय् दथुइ सकारात्मक सन्देश ह्वलेत हे थ्व फिल्म दयेकूगु खः। "पल" स्वयाः देय्या राष्ट्रपति रामवरण यादवं तकं तारीफ यानादीगु दु। थः छम्ह पर्यटन व्यवसायी नापनापं देय्या वातावरण भिंकेगु अभियानय् नं लगे जुयाच्वंम्ह कर्ण शाक्यं शहरया अंगलय् पोस्टर तिकाः शहर फोहोर मयायेगु घोषणा याये धुंकूगु दुसा "पल"या प्रचारया निंतिं अंगलय् पोस्टर मखुसें मेमेगु हे विकल्प नालीगु जूगु दु ।

रमेश बुढाथोकीया निर्देशनय् थ्व फिल्मय् संगीत न्ह्यु बज्राचार्य, म्येँ किरण खरेल, क्यामेरा राजुविक्रम थापा व एडिटिंग रजनीनाथ पन्तं याःगु खः। थुकी राजबल्लभ कोइराला, निशा अधिकारी, तृप्ती, रमेश बुढाथोकी, नीर शाह, धीरेन शाक्य व करिश्मा मानन्धर थेंज्याःपिं कलाकारतय् मू भूमिका दु ।

More Stories Like this