ऐतिहासिक बौद्ध लागाया भ्रमण

येँ (सन्ध्या टाइम्स)/मुनि विहारप्रमुख भिक्षु विपस्सीया नेतृत्वय् वंगु ६१ छम्ह भन्ते, गुरुमां व उपासक-उपासिकापिनि छगू पुचलं बुद्ध जन्मभूमि लुम्बिनीया थीथी ऐतिहासिक लागा भ्रमण यात। उगु पुचलं मायादेवी देगः व अशोक स्तम्भ दर्शन यासें छगू बुद्धपूजा नं यात। लिसें लुम्बिनी लागाय् च्वंगु फुक्क विहारया भ्रमण नं यात।
अथे हे कपिलवस्तुया ऐतिहासिक व धार्मिक लागात तिलौराकोट दरबारया अवशेष, निगोधग्राम कुदान, गोटीहवा व निग्लीहवा लगायत नवलपरासीया देवदह व रामग्राम नं चाःहिउगु खः। थाइल्याण्डय् बुद्धधर्म अध्ययन यायेत वनेत्यंपिं २२ म्ह श्रामणेरपिंत बुद्ध जन्मभूमि व नेपाःया मेमेगु बौद्ध स्थलया ज्ञान बीगु ताः तयाः उगु भ्रमण जूगु खः। भिक्षु विपस्सीया नेतृत्वय् २२ म्ह श्रामणेरपिं उखें तुं बैंकक बिज्याःगु खः ।