सहिद स्मारक 'ए’ डिभिजन कासा अन्तर्गत सरस्वती क्लबं त्याकल

येँ (झीगु स्वनिगः)

सहिद स्मारक 'ए' डिभिजन लीगय् म्हिगः जूगु न्हापांगु कासाय् सरस्वती क्लबं युनाईटेड युथयात ३ - १ गोलया अन्तरं बुकूगु दु । दशरथ रंगशालाय् जूगु धेंधेंबल्लाः कासाय् युनाईटेडया विजय शाहीं कासाया पीछगू मिनेटय् गोल याना टोलीयात अग्रता ब्यूगु खः । तर कासाया निगूगु हाफय् सरस्वतीया कासामिं युनाईटेडया कासामिपिंत गोल यायेगु ह्वःताः मब्यूगु खःसा अःखतं स्वंगू गोल यायेत ताःलाःगु खः ।
सरस्वतीया नितिं कासाया न्यय्प्यंगू मिनेटय् रमेह घिसिङ, ख्वीस्वंगू मिनेटय् टासी लामा व न्हय्च्यागू मिनेटय् योना इलीसं टीमया नितिं स्वंगूगु गोल यायेत ताःलाकूगु खः । अथेहे म्हिगः हे जूगु निगूगु धेंधेंबल्लाः कासाय् नेपाल पुलिस क्लब व हिमालयन शेर्पा क्लबं गोल रहित बराबरी म्हिताः अंक इनाकाःगु खः । पुलिसया नितिं म्हिगःया कासा न्हापांगु बराबरी खःसा हिमालयनया नितिं थ्व निगूगु बराबरी कासा जूगु खः ।

More Stories Like this