प्रचण्ड व झलनाथदथुइ याकनं राजीनामा मबीगु सहमति

येँ (झीगु स्वनिगः)

नेकपा एमालेया नायः नापं जुयाच्वनादीम्ह प्रधानमन्त्री झलनाथ खनाल व एकीकृत नेकपा माओवादीया नायः पुष्पकमल दाहाल प्रचण्डदथुइ राष्ट्रिय सहमतिया लकस तयार जुइधुंकाः जक प्रधानमन्त्रीं राजीनामा बिइगु सहमति जूगु दु । संविधानसभाया ई तनेगु नितिं मू स्वंगू राजनीतिक दलदथुइ जूगु न्यागू बुँदे सहमति कार्यान्वयनया बारे निम्ह नेतादथुइ मंगलवाः जूगु सहलहसं दलतदथुइ सहमतिया लकस तयार जुइधुंकाः जक प्रधानमन्त्रीं राजीनामा बिइगु सहमति जूगु खः । प्रधानमन्त्री खनाल व माओवादी नायः प्रचण्डदथुइ मंगलवाः प्रधानमन्त्रीया सरकारी निवास बालुवाटारय् जूगु नापलाये ज्याय् संविधानसभाया ई तनेन्ह्यः जूगु न्यागू बुँदे सहमतिया कार्यान्वयन बारे सहलह जूगु प्रधानमन्त्रीया प्रेस सल्लाहकार सूर्य थापां जानकारी बियादिल । मू स्वंगू दलया शीर्ष नेतातदथुइ जूगु न्यागू बुँदे सहमतियात नेतातय्सं ब्यागलं ब्यागलं कथंया ब्याख्या यानाः वयाच्वंगु दु । दलतदथुइ राष्ट्रिय सहमति कायम यायेगु नितिं याइगु कुतःया बारे नं प्रधानमन्त्री खनाल व माओवादी नायः प्रचण्डदथुइ सहलह जूगु खः ।