सरकारी ज्या त्वःताः हा लहीगुपाखे आकषिर्त

अर्घाखाँची (झीगु स्वनिगः)

अर्घाखाँचीया धनचौर गाविसया कृषक हा लहीगु अर्थात मौरीपालन व्यवसायपाखे आकषिर्त जूगु दु । म्हो लगानी व म्हो मिहेनतपाखें चीहाकःगु इलय् हे मनग्य अर्थोपार्जन यायेत ताःलायेवं थनया कृषक हा लहीगुपाखे आकषिर्त जूगु खः । धनचौर गाविसया कृषक वंगु झिदँ न्ह्यःनिसें व्यवसायिक रुपय् हे हा लहीगु ज्या यानाः वयाच्वंगु खः । गाविसया प्रत्येक छेँय् हा लहीनातःगु जूसां नं वडा नं. ५, ६, ७ व ८ या कृषकत धाःसा व्यवसायिक रुपय् हे हा लहीना मनग्य आम्दानी यायेत ताःलाःगु खः । धनचौरय् चिउरीया जंगल दुगुया लिसलिसे पर्याप्त ल्याखय् तुया खेती याइगु व हाया नितिं उपयुक्त कथंया फय् लः नापं दइगु जूगुलिं हा लहीगु व्यवसाय तसकं बांलानाः वःगु स्थानीय बासिन्दापिनिगु धापू दु । हा पाखें बिचाः यानागु स्वयाः आपालं आम्दानी कायेदयेवं युवा जमात नं वैदेशिक रोजगार व सरकारी जागिर नापं त्वःताः हा लहीगु ज्यापाखें आपालं आकषिर्त जूगु दु ।

धनचौरय् कृषकतय्सं छखा हे छेँय् न्यागू निसें न्यय्गू घारतक्क हा लहीगु ज्या यानाः वयाच्वंगु दु । दच्छिइ निक्वःतक्क हाया घार त्वाःथलाः मह लिकायेगु व छगू घारय् दच्छिया झिगू निसें नीगू केजीतक्क मह दइगु कृषकपिनिगु धापू दु । मुढे घारपाखें हा व्यवसाय सञ्चालन यानाः वयाच्वंपिं कृषकतय्सं थौंकन्हय् आधुनिक घारय् हा लहीगु ज्या यानाः वयाच्वंगु दु । आधुनिक घारय् हा लहीबलय् हाया सुरक्षा जुइगु व कस्ति उत्पादन यायेत नं तसकं अःपुइगु जूगुलिं मुढे घारय् उत्पादन जुइगु मह स्वयाः निगू तिहाइ अप्वः उत्पादन कायेफइगु उमिगु धापू दु । धनचौर गाविस - ५ या बासुदेव पाण्डें हा लहीगुपाखें दच्छिया निगू लख आम्दानी यानाः च्वनागु जानकारी बियादिल । वय्कलं स्वीगू घार हा लहीनाः वयाच्वनादीगु दु । हा लहीनाः वःगु आम्दानीपाखें खुम्हसिया परिवार लहीगुया लिसलिसे काय् म्ह्याय्पिंत ब्वंकाः वयाच्वनागु वय्कःया धापू खः । उगु हे गाविस ६ या लेखनाथ पाण्डें नं हा लहीगु ज्यापाखंे हे थःगु जीविकोपार्जन न्ह्याकाः च्वनागु धयादिल । नीगू घार हा लहीनाः च्वनादीम्ह पाण्डें दच्छिया छगू लख तकातक्कया आम्दानी यायेगु यानाच्वनागु धयादिल । सदरमुकाम सन्धिखर्कपाखें खुगू कोष ताःपाक्क लाःगु धनचौर विकट गाविस जूसां नं हा लहीगु ज्याया नितिं तसकं उदाहरणीय गाविस हे जूगु दु । थनया बासिन्दां छेँय् वइपिं पाहाँपिंततक्कं च्याया पलेसा कस्ति नकाः लसकुस यायेगु यानाः च्वनागु धयादिल ।

More Stories Like this