धुम्रपान रहित दिवस

म्हिगः मेइया ३१ तारिख विश्व न्यंक धुम्रपानरहित दिवस थीथी ज्याझ्वः यानाः हन । नेपालय् नं थीथी ज्याझ्वः यानाः हनेगु ज्या जुल । तर नेपालय् जक मखु विश्व न्यंकहे थ्व दिवसयात उलि महत्व व गम्भीरता व्यूगु खनेमदु । केवल छम्ह मनूया बुदिं हनेथें औपचारिकता जक पूवंकेगु वाहेक न्ह्यपंन वइगुकथं न्ह्यःने वंगु मदु, वनेफूगु मदु । नेपालय् सुर्तिजन्य पदार्थ छ्यलेबुलाय् हयेमज्यू, स्वास्थ्यया नितिं तसकं हानिकारक धाःसां उकिया प्रयोगय् कमि वःगु मदु । अज्जला नेपाःया ग्रामिण भेगय् अबुं मस्तय्त चुरोट त्वंनेगु वानी स्यनेगु यानावयाच्वंगु दु । चुरोट त्वनीपिं मां अबुं हे थः मस्तय्त थुगु लँपुइ मचायेक साला हयाः लिपा चुरोटया लत लगय् यायेगु ज्याया शुरुवात यानावी । उकिं सुर्तिजन्य पदार्थयात कम प्रयोग यायेगु खःसा गां गामय् अप्वः चेतना मूलक ज्याझ्वःत यंकेमाःगु आवश्यकता दु ।

विश्व स्वास्थ्य संगठनया छगू तथ्यांक कथं विश्वय् प्रतिवर्ष सुर्तिजन्य पदार्थ छ्यलावुलाया कारणं ६० लाख मनूत सिनाच्वंगु दु । नेपालय् थ्व ल्याः दच्छिया १५००० मनूत सुर्तिजन्य पदार्थया प्रयोगयाहे कारणं सी । थुकियात अज्ज स्पष्ट यायेगु खःसा प्रत्येक न्हि सुर्तिजन्य पदार्थ प्रयोगया कारणं ४१ म्ह थीथी रोगं ग्रस्त जुया प्रत्येक घन्टा २ म्ह नेपाःमित सिनाच्वंगु दु । सुर्तिजन्य पदार्थया कारणं थुगुकथं सिनाच्वंगु खँयात ध्यानय् तयाः हे विश्व स्वास्थ्य संगठनं थुकियात नियन्त्रण यायेगु उदेश्य २००३ सं सुर्तिजन्य पदार्थ नियन्त्रण सम्वन्धी अन्तराष्ट्रिय महासन्त्रि पारित याःगु खः । उगु महासन्धियात विश्वया १७२ गू देशं अनुमोदन याःगु दु । उगु सन्धिकथं सुर्तिजन्य पदार्थया माग व पूर्तियात म्हो यायेगु खः । थुकिया नितिं गुगु उद्योगयात हतोत्साही यायेगुकथं थीथी ज्याझ्वः यानायंकेमाःगु खः । थुकी कर अप्वयेकेगु, मूल्यवृद्धि याकेगु, विज्ञापन आदि याकेमवीगु, चुरोथ आदिया प्रचार प्रसार याकेमवीगु, चुरोथ मत्वंपिन्त सुरक्षा वीगु आदि ज्याझ्वः कार्यान्वयन यायेगु खः । नेपाल सूर्तिजन्य पदार्थ नियन्त्रण व नियमन यायेत ऐन २०६८ लागू जुइधुंकूगु दु ।

थुकियात अज्ज शसक्तरुपं लागू यायेगु खःसा हरेक थाय् यात धुम्रपानरहित क्षेत्रकथं घोषणा यायां सार्वजनिक थाय्बाय्यात धुम्रपान रहित क्षेत्र दयेकाः न्ह्याः वनेमाः । नापं सार्वजनिक थासय् चुरोटया विज्ञापन वन्द यानाः थ्व नाप सम्वन्धित उद्योगत नं वन्द याकेमाः । आयात यायेगु ज्या नं वन्द यायेगु धयागुहे यथार्थय् धुम्रपान दिवस हयेगुया चरितार्थ जुइ ।

More Stories Like this