थौं नेवाःतय्सं हाकूगु न्हि महनीगु
येँ (झीगु स्वनिगः)
थौं हाकूगु न्हि । नेपाःया आदिवासी जनजाति, मातृभाषा आन्दोनकारीतय्गु नितिं हाकूगु न्हि । तत्कालिन इलय् सर्वोच्च अदालतं स्थानीय निकायसं मां भाय् प्रयोग यायेमदु धकाः फैसाल याःगु इलंनिसें दँय् दसं नेपाःया आदिवासी जनजाति नापं नेवाःतय्सं जेठ १८ गते यात हाकूगु न्हि धकाः हनाः वयाच्वंगु खः । आन्दोलनया झ्वलय् मातृ भाषाभाषी समुदायतपाखें मंकाः कथं भाषिक अधिकार संयुक्त संघर्ष समिति अले नेवाःतय्सं नं थःगु हे कथं संघर्ष समिति दयेकाः आन्दोलन यायेगु झ्वलय् नेवाःतय्सं स्वनिगः बन्द तकं याये धुंकूगु खः । थगुने तक ला नेवाःतय्सं थौंया दिं जेठ १८ गते सतकय् हाकूगु ध्वाँय् ब्वयेका थीथी कथंया ज्याझ्वः याःगु खःसा थौं धाःसा अज्वःगु कथंया छुं नं ज्याझ्वः तयार याःगु मदु ।
हाकूगु न्हियात लुमंकाः नेवाःतय्गु राष्ट्रिय संगठन नेवाः देय् दबूपाखें औपचारिक रुपं छगू विज्ञप्ति जारी याःगु खने दु । नेवाः देय् दबूया नायः नरेश ताम्रकारं जारी यानादीगु उगु बिज्ञप्तिइ थःपिनिगु हक अधिकार कायेगु नितिं सकल नेवाःत छप्पँ जुयाः न्ह्याः वनेमाःगु खँ न्ह्यथसें संघीय लोकतान्त्रिक गणतन्त्र नेपालय् केन्द्रया भाषा खस भाषा छगू जक मयासे फुक्क आदिवासी जनजातिया भाषायात नं केन्द्रया कामकाजया भाषा यायेमाः धकाः माग यानातःगु दु ।
