थौं उप समितिया म्याद थप याइगु

येँ (झीगु स्वनिगः)

न्हूगु संविधान निर्माणया नितिं विवाद जुयाच्वंगु विषय ज्यंकेत संविधानसभाया संवैधानिक समिति अन्तर्गत दयेकूगु उप समितिया म्याद थौं थप याइगु जूगु दु । थौं बुधवाः संवैधानिक समितिया मुँज्या च्वनाः उप समितिया म्याद थप यायेगु नितिं म्हिगः सभामुख सुवाषचन्द्र नेम्वाङया कुतलय् मूमू राजनीतिक दलया नेतातय्गु दथुइ अनौपचारिक रुपं सहमति जूगु खः । वंगु जेठ १३ गते जक म्याद फूगु उगु उप समितिया कजि एकीकृत माओवादीया नायः पुष्पकमल दाहाल प्रचण्ड जुयादीगु खः ।

अथे हे म्हिगः सहलहया झ्वलय् स्वंगू दलं याःगु न्यागू बुँदाया सहमति कार्यान्वय यायेगु, न्हूगु संविधानया मस्यौदा निलाया दुने दयेका संविधानसभाय् यंकेगुृ नापं मेमेगु विषयसं नं सहलह जूगु खः धकाः धाःगु दु । संविधानसभाया म्याद थप याये धुंकाः न्हापांखुसि मूमू राजनीतिक दलया नेतातय्गु दथुइ अनौपचारिक रुपं जूगु उगु मुँज्याय् एकीकृत माओवादी, नेपाली कांग्रेस, एमाले नापं मेमेगु दलया नेतात नाप नापं उप सभामुख, संवैधानिक समितिया सभापति नं उपस्थिति जुयादीगु खः ।