'सरकारया नेतृत्व हस्तान्तरण यायेत तयार’

राष्ट्रिय सरकारया नितिं भूमिका म्हितेत कांग्रेसयात इनाप

येँ (झीगु स्वनिगः)

प्रधानमन्त्री झलनाथ खनालं राष्ट्रिय सहमतिया सरकारया नितिं थः पंगः जु्याच्वनागु मदु धकाः स्पष्ट यानादीगु दु । म्हिगः मंगलवाः सनिलया ४ ताः इलय् देशवासीया नामाय् सम्वोधन यानादिसें प्रधानमन्त्री खनालं अथे धयादीगु खः । नेपाल टेलिभिजन, रेडियो नेपाल नापं थीथी संचार माध्यमं प्रत्यक्ष प्रशारण याःगु उगु सम्वोधनया झ्वलय् वय्कलं राष्ट्रिय सहमतिया सरकारया नितिं लँपु चायेकेत थः हथाय् चायाच्वनागु दु धकाः नं धयादिल । प्रधानमन्त्री खनालं न्हूगु सरकार गठनया नितिं नेपाली कांग्रेसयात गम्भीर जुयाः थवं थवय् सहमतिया नितिं कुतः यायेत इनाप नं यानादिल । प्रधानमन्त्री खनालं धयादिल 'जिमिसं राष्ट्रिय सहमतिया सरकार गठन यायेगु सहमति याये धुनागु दु । सरकारया विकल्पया नितिं मूल रुपं प्रमुख प्रतिपक्ष नेपाली कांग्रेस जिम्मेवार जुइमाःगु खँय् ध्यान बियाः कांग्रेसयात राष्ट्रिय संयुक्त सरकारया विकल्पया नितिं गम्भीर जुइत नापं थःम्हं नं माःगु कथं कुतः यायेगु जुइ ।'

अथे सम्वोधन यायेगु झ्वलय् खनालं आःया अवस्थाय् कांग्रेस प्रतिपक्षया हैसियतं रचनात्मक कथं भूमिका म्हितेत नं इनाप यानादिल । वय्कलं धयादिल 'सरकारया नेतृत्व हस्तान्तरण यायेत तयार दु, न्हूगु सरकार गठन यायेगु ज्या लिबाकेगु जुइमखु । १४ गतेया सहमतियात थःथःगु ब्याख्या यायेगुसिबें सहमतिया नितिं ठोस आधार तयार यानाः संविधान व शान्ति प्रकृया क्वःछिइमाः ।' जेठ १४ गते जूगु ५ बुँदाया सहमतियात कार्यान्वयनया नितिं प्रधानमन्त्री व एमालेया नायःया हैसियतं न्ह्याः वनेत तयार दु धयादिसें वय्कलं स्वंगू दलया सहमतिं थः तसकं खुसी जूगु दु धकाः नं न्ह्यथनादिल । प्रधानमन्त्री खनालं सरकारयात क्षेत्रीय व अन्तर्राष्ट्रिय दबावत वयाच्वंगु दु धकाः न्ह्थनादिसें अज्वःगु अवस्थाय् नेपाःया राजनीतिक दलत कुचा कुचा जुयाः मेपिन्त ग्वहालि फ्वनेगु ज्या यायेमजिउ धयादिसें दलतय्गु दुनेया अन्तरविरोधय् छगू पार्टीं मेगु पार्टीइ दुने म्हितेगु पाय्छि मजू धकाः नं स्पष्ट यानादिल ।

वय्कलं धयादिल 'न्हापा न्हय्ला न्हय्ला तक नं सरकार विहिनताया अवस्था जूगु पिडादाइ अवस्थायात थ्व इलय् लुमंकेमाः, उगु खँयात नं माःगु कथंया ध्यान बियाः झीसं थुगुसी बुद्धिमतापूवर्क पलाः ल्ह्वनेमाःगु आवश्यकता दु ।' उप प्रधानमन्त्रीपिं भरतमोहन अधिकारी, कृष्णबहादुर महरा व उपेन्द्र यादवयात न्ह्यःने तयाः याःगु उगु सम्वोधनया झ्वलय् प्रधानमन्त्री खनालं धयादिल 'संविधानसभापाखें न्हूगु संविधान जारी यानाः क्रान्तिया उपलब्धियात संस्थ्ाागत यायेगु बाय् मुलुकय् हाकनं मेगु बहुआयामिक ल्वापुइ फसेयायेगु धैगु थुगु निपु् लँपु मध्ये छपु ल्ययेगु जक झीगु न्ह्यःने विकल्प दु । थज्वःगु अवस्थाय् झीसं शान्ति, संविधान व अग्रगमनया लँपु ल्ययागु दु थ्व यथार्थयात संविधानसभां रक्षा नं यानागु दु ।' प्रधानमन्त्रीया सम्वोधनय् थः प्रधानमन्त्री जुसांनिसें आः तकया राजनीतिक घटनाक्रमयात संक्षिप्तं न्ह्यथसें बक्तब्यय् थुगु कथं न्ह्यनातःगु दु 'वास्तवय् थ्व हे ऐतिहासिक महत्वया ज्या पूवंकेगु नितिं हे नकतिनि जक न्यागू बुँदाया सहमति जूगु खः । उगु सहमति कथं स्वलाया दुने शान्ति प्रक्रियाया मूलभूत ज्या क्वचायेकेगु व संविधानसभापाखें हे न्हूगु संविधानया न्हापांगु मस्यौदा तयार यायेगु नापंया महत्वपूर्णगु लक्षयात आत्मसाथ यानागु दु । मुलुकयात थ्व सहमतियात कार्यान्वय यायेगु ज्याया नितिं फुक्क दलतपाखें भूमिका म्हितेमाःगु अवस्था दु ।'