न्हापां सहमति कि राजीनामा?
येँ (सन्ध्या टाइम्स)/प्रमुख प्रतिपक्षी नेपाली कांग्रेस व एमालेया माधव-ओली पक्षधर नेतातय्सं न्यागू बुँदे सहमति कथं राष्ट्रिय सहमतिया नितिं प्रधानमन्त्रीं राजीनामा बीमाः धयाच्वंगु हे इलय् माओवादी अध्यक्ष प्रचण्ड व प्रधानमन्त्री एवं एमालेया अध्यक्ष झलनाथ खनालं राष्ट्रिय सहमति जुइधुंकाः जक राजीनामा बीगु धकाः सहमति याःगु दु ।
थौं सुथय् प्रधानमन्त्री निवास वालुवाटारय् निम्ह नेताया दथुइ जूगु खँल्हाबल्हाय् उगु सहमति जूगु खः। न्यागू बुँदाया सहमति धुंकाः न्हापांखुसी प्रचण्ड व झलनाथया दथुइ भेटवार्ता जूगु खः। न्यागू बुँदाया सवालय् प्रधानमन्त्री खनालं न्हापांखुसी हे प्रचण्डलिसे सहलह ब्याकादीगु खः।
संविधानसभाया म्याद थप याये न्ह्यः माओवादी, कांग्रेस व एमाले दथुइ जूगु न्यागू बुँदाया सहमतिया अन्तिम बुँदाय् प्रधानमन्त्रीया राजीनामाया खँ न्ह्यथनातःगु दु ।
उगु बुँदाय् 'राष्ट्रिय सहमतिया संयुक्त सरकार गठनया निंतिं प्रधानमन्त्रीं राजीनामा यानाः मार्ग प्रशस्त यायेगु' धकाः न्ह्यथनातःगु दु ।
प्रचण्ड व खनाल दथुइ बाघौ तक जूगु भेटवार्ताय् स्वंगू दल दथुइ जूगु न्यागू बुँदाया सहमितयात गुकथं कार्यान्वय यायेगु धइगु विषयय् सहलह जूगु जानकारी प्रधानमन्त्रीया प्रेस सल्लाहकार सूर्य थापां संचारकर्मीतय्त बियादीगु दु।
वय्कलं न्यागू बुँदाया सहमति कार्यान्वयनया निंतिं प्रधानमन्त्री खनालं मेमेगु दलया नेतातलिसे नं सहलह ब्याकादीगु खँ कनादीगु दु ।
उकियात कांग्रेसया नेतात नापं एमालेया माधव-केपी पक्षया नेतातय्सं राष्ट्रिय सहमतिया निंतिं प्रधानमन्त्रीया राजीनामा धाःगु खः धकाः ब्याख्या याना वयाच्वंगु खःसा प्रचण्ड व खनालं धाःसा न्हापां राष्ट्रिय सहमति अले राजीनामा धकाः ब्याख्या याना वयाच्वंगु दु। स्वंगू दलं पिनेया मेमेगु दलया नेतातय्सं धाःसा उगु बुँदा हे अस्पष्ट जुयाच्वंगु दु धासें दलतय्सं दकलय् न्हापां उकियात निं स्पष्ट यायेमाःगु खँ धाःगु दु ।
प्रचण्डं धाःथे हे प्रधानमन्त्री
थौंकन्हय् गुकथं प्रधानमन्त्रीया राजीनामाया सवालय् थीथी दलया नेतातय्सं थःथःगु कथं ब्याख्या यानाच्वंगु खः वास्तवय् माओवादीया अध्यक्ष प्रचण्डं जक राजीनामा बिउ धायेवं खनालं राजीनामा बियादी धकाः एमालेया छम्ह नेतां धयादीगु दु। माओवादी दुने नं मोहन बैद्य पक्षधर नेतातय्सं आःया अवस्थाय् राजीनामा बी मजिउ धयाच्वंगुलिं हे प्रचण्डं नं राजीनामाया सवालय् न्हापां राष्ट्रिय सहमति धयाच्वंगु खः धकाः छम्ह नेतां धयादीगु दु ।
