निलाया दुने हे संविधानया मस्यौदा दयेकीगु
येँ (सन्ध्या टाइम्स)/आः वइगु स्वलाया दुने न्हूगु संविधानया मस्यौदा तयार यायेगु धकाः तःधंगु दलतय् दथुइ सहमति जूगु खःसां संविधानसभाया संवैधानिक समितिया थौं च्वंगु अनौपचारिक बैठकं धाःसा स्वला मदु निलाया दुने हे संविधानया मस्यौदा तयार यायेगु धकाः निर्णय याःगु दु ।
संविधानसभाया सभामुख सुभाष नेम्बाङं थौं थ्व बैठक सःतादीगु खः। बैठकं संविधानसभाया थीथी विषयगत समितितय्सं तयार याना तयेधुंकूगु संविधानया फुक्कं प्रतिवेदनत छथाय् तयाः निलाया दुने हे संविधानया मस्यौदा तयार याना संविधानसभाय् पेश यायेगु निर्णय याःगु खः ।
बैठकं संविधान च्वयेगु ज्याय् वयाच्वंगु समस्या समाधान यायेत गठन यानातःगु उपसमितिया म्याद थपे यायेगु व स्वंगू दलया दथुइ जूगु न्यागू बुँदे सहमति कार्यान्वयन यायेगु विषयय् नं सहलह याःगु खः ।
बैठकय् उपसभामुख पूर्णा सुवेदी, संवैधानिक समितिया सभापति निलाम्बर आचार्य नापं थीथी दलया नेतातय्सं ब्वति कयादीगु खः ।
उप समितिया म्याद हानं थपे याइगु
न्हूगु संविधान निर्माणया निंतिं विवाद जुयाच्वंगु विषय ज्यंकेगु नितिं संवैधानिक समिति अन्तर्गत गठन यानातःगु उप समितिया म्याद हाकनं थप याइगु जूगु दु। वंगु १३ गते उपसमितिया म्याद फुगु खःसा आः हाकनं कन्हय् संवैधानिक समितिया म्याद थप यायेत मूमू स्वंगू दलया नेतातय् दथुइ सहमति जूगु दु। सभामुख सुभाष नेम्बाङं थौं सःतादीगु अनौपचारिक बैठकय् अथे सहमति जूगु खः ।
