ठक्कर नकाः मनू सीवं ट्रक च्याका बिल
येँ (सन्ध्या टाइम्स)/बनेपापाखे वनाच्वंगु बा. २ ख ९७६९ नम्बरया ट्रकं ठक्कर नकाः काभ्रेया भैंसेपाटी लागाय् छम्ह स्थानीय मनू सीवं स्थानीयवासीतय्सं उगु ट्रक हे च्याका बिउगु दु ।
भैंसेपाटीया हिमाल ग्याँस लिकसं अरनिको राजमार्गया द्यःयाथाय् वनाः लिहां वःम्ह ६० दँया भीमबहादुर मधिकर्मी ट्रकं ठक्कर नकाः सीगु खः। मनू सीवं आक्रोशित जूपिं स्थानीय मनूतय्सं ट्रकयात नियन्त्रणय् कयाः च्याका बिउगु खःसा वयां लिपा सुथंनिसें हे उगु घटनाया विरोधय् प्रदर्शन यानाः सीम्हेसिया छेँजःपिन्त क्षतिपूर्ति बीमाःगु नापं चालकयात कारवाही यायेमाःगु माग यानाः यातायात ठप्प याना बिउगु खः। चालक धाःसा दुर्घटना जुइवं गाडी त्वःताः जंगलपाखे बिसिउँ वंगु खँ धाःगु दु ।
ब्रेक फेल जुयाः बस स्वत्यांग्रा पुल
खोटाङया सदरमुकमा दिक्तेलं ओखलढुंगापाखे वनाच्वंगु ना. ३ ख २४९२ नम्बरया यात्रुबहाक बस थौं सुथय् ब्रेक फेल जुयाः स्वत्यांग्रा पुलाः ५० मिटर क्वय् कुतुंवंगु दु। उगु दुर्घटनाय् लानाः १८ म्ह घाःपाः जूगु दु। चालक नापं घाःपाः जूगु उगु दुर्घटनाय् घाःपाः जूपिं मध्ये निम्ह मिसापिं नापं खुम्हेसिया स्थिति गम्भीर जुयाच्वंगु दु। घाःपाः जूपिंत स्थानीय स्वास्थ्यचौकीइ वासः याकाच्वंगु दु ।
