झीगु ख्यःया छम्ह भिंम्ह मनू

सुजीव बज्राचार्य

नरेशकुमार शाक्य मदुगु थनिं झिन्हु दत। मत्यवं मदुगुलिं नरेशयात म्हसिउपिं झी फुक्क दुःखित जुया। अले नरेशयात लुमंकाः श्रद्धाञ्जली थःथःगु थासं देछाना ।

नेवाः ख्यलय् नरेशयात कयाः थुकथं चर्चा परिचर्चालिसें नरेशयात गुकुन्हु जलस्येँया ल्वचं कल धइगु खँ सिल उगु इलंनिसें हे 'नरेश' मात्र छम्ह याकःचाम्ह व्यक्ति मजुल। नरेशया जलस्येँ स्यंगु बुखँ वल। ४१ दँ तिनि दुम्ह नरेशया जलस्येँ स्यंगु समाचार वयेवं नरेशयात म्हसिउपिं, नरेशया नां न्यंपिं नरेशयात ग्वाहालि यायेत 'नरेशकुमार शाक्य स्वास्थ्य उपचार समिति' नीस्वन ।

नरेशकुमार शाक्य दकलय् न्हापां ला स्नातक तगिं पास जूगु शैक्षिक योग्यता दुम्ह छम्ह व्यक्ति खः। तर थीथी पारिवारिक हुनिं यानाः नरेशं कम्पोजिटर जुयाः थःगु जीवन न्ह्याकल ।

०५० सालपाखे नरेश नेपालभाषाया न्हिपौ 'विश्वभूमि'या छम्ह कम्पोजिटर जूसां नं नरेश उगु इलंनिसें मात्र कम्पोजिटर जक मखु 'विश्वभूमि' न्हिपौयात बांलाकेगु निंतिं छम्ह बांलाःम्ह कर्मचारीकथं पलिस्था जुल। 'विश्वभूमि'इ थुकथं दँदँ ज्या यायेधुंकाः 'विश्वभूमि' दुनेया आन्तरिक कचमचया हुनिं 'विश्वभूमि' विभाजन जुल। जिपिं 'विश्वभूमि'इ हे च्वनाः ज्या याना, अशोक श्रेष्ठं 'न्हूगु विश्वभूमि' पिकयादिल। थ्वहे क्रमय् नरेश 'विश्वभूमि'इ कम्पोजिटरकथं दुहां वल। लिपा आन्तरिक रुपं छम्ह प्रेस व्यवस्थापक जुयाः ज्या याइम्ह व्यक्ति जुयावन। नरेशं नेपालभाषाया यक्व सफूया निंतिं कम्पोज यायां वंगु कारणं स्वभाविक रुपं व छम्ह बांलाःम्ह नेपालभाषाया प्रेस व्यवस्थापक जुल ।

नेपालभाषा पत्रकारिताया घटनाक्रमय् हानं 'विश्वभूमि' नं दुने व्यवस्थापन कचमच जुल। उगु इलय् नरेश 'विश्वभूमि' न्हिपती तुं च्वनाः ज्या यात, जिपिं 'सन्ध्या टाइम्स' न्हिपौ पिकयाः ज्या याना। नरेशं ताः ईतक 'विश्वभूमि' न्हिपौ दुने आन्तरिक व्यवस्थापक कथं ज्या यात। थ्वयां लिपा नरेश 'विश्वभूमि' त्वःताः नेपालभाषाया न्हिपौ 'न्हूगु विश्वभूमि'इ ज्या याः वन। थुकथं 'विश्वभूमि' न्हिपौपाखें ज्या याःम्ह नरेश 'विश्वभूमि', 'न्हूगु विश्वभूमि' जुयाः हानं 'अप्सरा' वाः पती ज्या यात। 'अप्सरा' वाःपती प्यदँ न्यादँ ति ज्या यायेधुंकाः नरेशं थःगु हे अफसेट प्रेस तयाः डिजाइनया ज्या यात। थीथी मगाःमचाः दुने नं नरेशं प्रेस सञ्चालक जुयाः ज्या यात ।

नरेश छम्ह बांलाःम्ह डिजाइनर जूगुलिं यक्व सफू व नेपालभाषाया सीडीया समेत डिजाइन याःगु दु। जलस्येँ ल्वचं कये न्ह्यः नरेशं 'नेवाः स्वायत्त राज्य छु खः?' धइगु मल्ल के. सुन्दरया सफूया कभर डिजाइन यात। अथेहे वंगु पुस ११ गते नेवाः स्वायत्त राज्य घोषणा जूगु किपाया पोष्टर नं डिजाइन यात। नरेश मदये न्ह्यः तक नं नेपालभाषा ख्यःया छम्ह बांलाःम्ह प्राविधिक मनू जुयाः म्वाना वन।
नरेशया मेगु विशेषता धइगु थःपिं चीधंगु ज्या यायेमाःसां नं तःधंगु ज्या याइपिंत हःपाः बीम्ह व्यक्ति खःसा पासापिं नाप तसकं मिलनसार अले न्ह्यइपुगु लकस दयेकेफुम्ह व्यक्ति खः ।

नरेश थुकथं थःगु जीवनया ल्याय्म्ह इलंनिसें नेपालभाषा पत्रकारिता छापाखानाया ज्याय् निरन्तर थःगु जीवनयात छ्यला वयाच्वंगु हुनिं यानाः हे नेपालभाषा ख्यलं नरेशयात लुमंकूगु खः ।

नरेश स्वास्थ्य उपचारया नितिं समिति नीस्वनाः छुं लख दां म्हयेफुगु खःसा नेवाः नुगः दुपिं मनूतय्सं वयागु स्वास्थ्य उपचारया नितिं आर्थिक ग्वाहालि याःगु खः। नरेशं म्वानाच्वंगु ईतक नेपालभाषा ख्यःयात छु क्यना वन धायेबलय् नेपालभाषाया सेवा यायेत कवि हे जुइमाः, च्वमि हे जुइमाः धइगु मदु, इमान्दार रुपं छम्ह बांलाःम्ह प्राविधिक जूसां नं गाः, मात्र नेवाः नुगः जक दःसां गाः। उकिं नरेश नेपालभाषा ख्यलय् न्ह्याबलें नं लुमंकेबहःम्ह व्यक्ति जुयाः म्वानाच्वनी ।

More Stories Like this