आशा यायेफु

नर्मदेश्वर प्रधान

खँयाखँय्
हब्सी छज्वः। उमेर दनिपिं। इमि निम्हम्ह मचा दइ। काय मचा दत। इपिं लय्तामाःगु खः। तर बौम्ह लय्ताः फइ मखु। बौम्हं कायया ख्वाः स्वइ। वया न्ह्यपु चाःहिली। फनफन चाःहिली। छु जूगु थ्व? व अन्यौलय् लाइ। अनेक शंका लुइ। अजूचाइ। धात्थें छु जूगु थ्व? कलाःपाखे स्वइ। तं वइ। मिसातय्त विश्वास याये मजिउ खनिं। गज्याःगु धोका? छलछाम थ्व ! पलख आक्रोशित जुइ। बुलुहुँ तं क्वलनी। मन तइ। बिचाः याइ। जिं अथे शंका याये मजिउ। वं जितः विश्वासघात याइ मखु। वं जितः माया याः। वयागु मतिनायात जिं शंका याये मजिउ। व स्वच्छ। जिं विश्वास यायेमाः ।

अय्सा छु जुल ले? गय् अथे जूवन? कारण छु जुइ? जिं सीके हे माः। तर गय् सीकेगु? सुयाके न्यनेगु? कारण सीके फुसा ला जिल का। लःया लः दुरुया दुरु सी दइ। तर कारण रहस्यया गर्भय् तना बिल कि? जिं छु याये? दुविधाय् लाइ। झं शंकां ग्रष्ट जुइ। छटपट जुइ। हीमी चाये। इर्ष्या लुइ। सुइगु ज्या जुइ थ्व? सुइगु षड्यन्त्र जुइ थ्व? हानं मन तइ। वयात शंका याये मजिउ। मखुगु दृष्टिं स्वये मजिउ। वयाके अज्याःगु लक्षण छुं खने मदु। वं माया याः दुनें निसें। वया व्यवहारय् शंका यायेथाय् मदु। व अज्याःम्ह मखु। उकुन्हु उकुन्हु थें मखु। थौंकन्हय् जिं मनयात बसय् तये। म्वाः मदुगु विचाः मयायेधुन। वयागु छुं दोष मदु। जि ढुक्क जुइ। अय्नं कारण छु? जिं सीकेमाः। जि जिज्ञासु जुइ। अथे गय् जुल? जिं सीकेत स्वये ।

बौ हब्सीया नुगलय् तरङ्ग लुयाच्वनी। हब्सीया काय्। हाकुइ माःगु खः। तर अःखः। तुइसे भुइसे च्वना बी। मांबौ निम्हं गजब। बौम्ह अप्वः संवेदनशील जुइ। गम्भीर जुइ। हब्सीया मचाया छ्यंगू हाकुस्से च्वनी। च्वनेमाः। हब्सीतय् निम्तिं हाकुगु छ्यंगू हे महान जुइ। थःगु पहिचानया आधार। हाकुपिंसं तुयूपिंपाखे अवहेलना, अनादार फयेमाली। हाकुपिंसं तुयूपिंत ययेकीमखु ।

तिरस्कार याइ। तुयूगु रङ्ग हाकुपिंत शोषण दमनया प्रतिक जुइ। तुयूगु रङ्गप्रति हाकुपिंके घृणा दइ। हब्सी भाजु फसादय् लाइ। थः हब्सी। बूम्ह काय्या छ्यंगू तुयू। भुयू। अंग्रेजतय् थें। निम्हतिपू। निम्ह मचा अखबारय् तस्बिर खनी। चीधिकःम्ह मचा। हालय् बूम्ह। वया ख्वाः तुयू। बुखँ ब्वने। बूम्ह काय्म्ह खनी। बौम्हेसिया मनोविज्ञान खलबलय् जुइ। तस्बिर स्वये। जि नं अजू चाये। छु जूगु थ्व? चटक थें। हाकुम्हेसिया मचा। तुयूम्ह। भुयूम्ह। पासिमाय् चाक्सि सः थें। हिसाबं छु पिल वहे सयेमाः। प्रकृतिया नियम जुइ। हब्सीया मचा हाकुइ। जातीय खेतीया थ्व नियम खः। तर थन प्राकृतिक नियम भङ्ग जुइ। हब्सीया काय तुइसे भुइसे। जादूगरं रङ्गया चटक क्यं थें। खल्ती हाकुगु रुमाल स्वथनाः तुयूगु रुमाल पिकाइ थें ।

उबलय्। मचाबलय्। मचा दइगु खँ जादू थें चटक थें ताइगु। ह्याउँमस्त खनी। मचाबुद्धि। गजब जुइ। गुलिस्यां धाइ आकाशं कुतुंवःपिं। गुलिस्यां धाइ न्हाय्पनं पिहां वःपिं। न्यने। अजूचाइ। चकित जुइ। क्या चटक ! कल्पना ब्वइ। मथूतले, मसिउतले न्ह्यागु नं चटक थें हे मखा ! सिल कि गथः ब्यनी। खँ थुइ। हब्सीया काय् गय् तुयूम्ह जुल?
कारण अस्पष्ट जुइ। अनुमान याये। अःपुइ मखु। अबुम्हेसिया न्ह्यपु नइ। कलाः खनी। तं वइ। सु भुयूचालिसे सन जुइ थ्व........। तर मन काबुइ काइ। मन तइ। कलाःयात विश्वास याइ। वं न्यनी। वया कलाःया वंशय् न्हापा नं अथे जुइधुंकल। स्वंगू प्यंगू पुस्ता न्ह्यः वया कलाःया हब्सी कुलय् तुयूम्ह मचाया जन्म जूगु दु हँ। खँ न्यनी। विचाः याइ। शायद अथे हे जूगु जुइ। कलाःप्रति व निश्चिन्त जुइ ।

हब्सी ज्वःया बुखँ ब्वने। तस्बिर स्वये। हाकुम्ह मांबौया तुयूम्ह काय खनी। घटना जिगु कल्पनाय् थी। अनेक खँत लुइ। छु जूगु जुइ। छाय् जूगु जुइ। अनेक शंका लुइ। शंका यायेमास्ति वइ। पुलांपुलांगु खँत लुमनी। स्वाकेमास्ति वइ ।

छगू घटना। यक्व न्ह्यः। अखबारय् ब्वनागु। लुमना वइ। छम्ह अविवाहित मय्जु। अचानक वया प्वाथय् दइ। थौंकन्हय् कुमारी मांपिं दयेधुंकल। अविवाहित मय्जुपिनि गर्भाधान जुइगु न्हूगु खँ मजुइधुंकल। तर व पुलांगु घटना। उबलय् स्थिति पाः। अविवाहित मय्जु सुं लिसे संसर्गय् मवःम्ह। सहवासया अनुभव मदुम्ह। वया गर्भाधान जुइ। वयात केरमेर याइ। केलफेल याइ। अनुसन्धान याइ। तर मय्जुं थः निर्दोष जूगु खँ कनी। व कायल जुइ मखु। खोजी जुइ। अन्तय् निष्कर्ष पिहां वइ। व अविवाहित मय्जुया गर्भाधान गुगु सहवासं जूगु मखयाच्वन। छन्हु वं गन च्व फाइ। मिजंम्हं नकतिति च्व फाना थकूगु थाय् जुयाच्वन व। अनया अन मय्जुं च्वफाइ। उबलय् हे शुक्रकीत गर्भाशयय् दुहां वनी। फलस्वरुप कृत्रिम गर्भाधान जुया बी। रहस्य ब्यनी। मती लुइ। थ्व घटना शिक्षाप्रद। मिसा मिजंतय् ट्वाइलेट अलग्ग जुइमाः। अन्यथा मखुगु दुर्घटना जुया बी। शायद हब्सी मय्जुं तुयूम्ह भाजुं च्व फाःथाय् च्वः फात ला? वया लिच्वः खःला तुयूम्ह मचा ! खँ स्वाके। कल्पना याये ।

हालय् अखबारय् ब्वने। नेपालय् सन्थाल जातिइ बाःजुपिंसं छ्यलीगु चःबिइ भौपिंसं छ्यले मजिउ हं। दुर्घटनाया चिउताः तयाः हे शायद थज्याःगु लोकचलन शुरु जूगु ला? मती च्वनी ।

थौंकन्हय् प्रकृतिया नियम नं हिला वयाच्वंगु दु। पोषक नसा। देशविदेशं वःगु नसात्वँसाया परिकार। खाद्य, अखाद्य पदार्थ। वातावरणीय असन्तुलन। परिवर्तन। इत्यादिया कारणं मनूतय् प्रजनन् क्रियाय् प्रभावित याःगु खनेदु। म्हिगः बागःचापिनि मस्त बागःचा जुइ धइगु धारणा। तर थौं बागःचापिनि छगःचापिं मस्त बूगु यक्व उदाहरण दु। दुषित वातावरण, दुषित नसाया कारणं नाना रङ्गया मचात मदइ धाये फइ मखु। होश यायेमाली ।

छता न्यना खँ लुमनी। मचा प्वाथय् दुबलय् छम्ह मेमसाहेबं न्हियान्हिथं हब्सीया किपा खनीगु हं। वया बूम्ह मचा हब्सी थें हाकुस्से च्वना बी। अनुसन्धान जुइ। लिच्वः पिहां वइ। प्वाथय् दुबलय् गज्याःम्ह मनू वा मनूया किपा न्हियान्हिथं खनी उकिया लिच्वः प्वाथय् च्वंम्ह मचायात लाःवनी। पुलांपिसं प्वाथय् दुबलय् द्यःया तस्बिर स्व धकाः उकिं हे धाइगु जुइ। जि बिचाः याये। तुयूम्ह मचा बुइकूम्ह हब्सी मय्जुं नं प्वाथय् दुबलय् तुयूम्ह साहेबया किपाय् अप्वः मिखा तल ला? जिगु अनुमान जुइ ।

तर थौंकन्हय् कुमारी मांया चलन वयाच्वंगु दु। मचा सु ख्वाः वः? सु ख्वाः मव? थज्याःगु तनावं सुं नं ग्रस्त जुइम्वालीगु न्हि वइतिनि। आशा यायेफु ।

More Stories Like this