ब्याट्मिटनय् स्कटया नियम रद्द

विश्व ब्याट्मिटन फेडेरेशन विडब्लुएफं धेंधेंबल्लाः कासाया झ्वलय् मिसा कासामिपिंसं स्कट पुनेगु विवादास्पद न्हूगु नियम चीकूगु दु । थ्व नियम लागू जुइन्ह्यः हे रद्द याःगु खः । थ्व नियम जुन १ निसें लागू यायेगु धयातःगु खः । ब्याट्मिटनया ग्ल्यामरस दयेकेत धासें विडब्लुएफं छुं ई न्ह्यः जक धेंधेंबल्लाः कासाया झ्वलय् मिसा कासामिपिंसं स्कट पुनेमाःगु न्हूगु नियम हःगु खः । तर, स्कटल्याण्डया इमोगेन ब्याकियर लगायत सुं मिसा कासामिपिंसं विरोध याःगु खः । इमोेगेनं मिसातय्त स्कटय् हे स्वयेमास्ते वःगु खःसा ब्याट्मिटनया मैदानय् मजुसे मेथाय् हे वनेमाःगु बिचाः तःगु खः ।

विडब्लुएफं पिथंगु विज्ञप्तीइ धयातःगु दु - 'मिसा कासामिपिनिगु वसः सम्बन्धी नियमबारे थप अध्ययन यायेगु व अबलेतक्क स्कट पुनेमाःगु नियम लागू मयायेत थीथी ब्याट्मिटन समितिं ब्यूगु थुपिं सुझावत जिमिसं स्वीकार याना ।' विश्व ब्याट्मिटन फेडेरेशन विडब्लुएफय् पूर्व विश्व च्याम्पियन नोरा पेरीं मिसातय्गु प्रतिनिधित्व याइ । वय्कलं ब्याट्मिटनयात उपयुक्त ढंगं सञ्चालन यायेगु नितिं मिसा लिसे मिजंत फुक्कसिगु सुझाव कायेमाःगु खँय् बहः ब्यूगु खः ।

More Stories Like this