शहीद स्मारक 'ए’ डिभिजन लीग फुटबल कासाय् एपीएफ व बाँसबारी क्लब त्यात

येँ (झीगु स्वनिगः)

येँय् न्ह्यानाच्वंगु शहीद स्मारक 'ए' डिभिजन लीग फुटबल धेंधेंबल्लाः कासा अन्तर्गत म्हिगःया न्हापांगु कासाय् सशस्त्र प्रहरीया ए पी एफं बि्रगेड ब्याइजयात ७ शून्य गोलया अन्तरं उगु कासा त्याकूगु खः । थ्व स्वयाः न्ह्यः नं कासाय् जित दर्ता यायेमफुगु एपीएफया जीवन सिकेमनं झिंन्यागू मिनेटय् खाता चायेकूगु खः । अनलिपा न्हापांगु हाफय् सौरभ मगरं स्वीच्यागू मिनेटय् गोल याःगु खः । निगूगु हाफया ख्वीप्यंगू व च्यय्गू मिनेटय् गणेश लावती, च्यय्प्यंगू मिनेटय् जीवन सिकमनं गोल यायेत ताःलाःगु खः । धेंधेंबल्लाः कासाया च्यय्खुगूगु मिनेटय् बि्रगेडया अमिताभ सुनुवारं आत्माघाती गोल याःगु खः ।

गुइगू मिनेटलिपा कासाया थप याःगु इलय् गणेश लावतीं थःगु नितिं ह्याटि्रक गोल यानाः टोलीयात न्हय्गूगु गोल यायेत ताःलाःगु खः । अथेहे म्हिगः हे जूगु निगूगु धेंधेंबल्लाः कासाय् स्वयम्भू दथुइ बाँसबारी क्लबं जित दर्ता यायेत ताःलाकूगु खः । बाँसबारीया नितिं कासाया न्हापांगु हाफ क्वचाये हे त्यंगु पीन्यागूगु मिनेटय् भोला राईं गोल यानाः थःगु टीमयात त्याकेत ताःलाःगु खः ।

More Stories Like this