क्यालेण्डर कथं हे टि. यु.या परिक्षा प्रणाली न्ह्याइ : शर्मा

येँ (झीगु स्वनिगः)

अनेरास्ववियु क्रान्तिकारीया नायः हिमाल शर्मां माओवादी नेताया काय् म्ह्याय्पिंत निजी विद्यालयपाखें लिकाइगु जानकारी बियादीगु दु । थःथितिपिंसं ब्वंकाब्यूगु धासें सुं सुं नेतातय्सं काय् म्ह्याय्पिंत बोर्डिङ स्कूलय् हे ब्वंकेगु दाउ म्हितूगु जूसां नं उमित छुट मबीगु शर्माया धापू खः । क्रान्तिकारी पत्रकार संघ पाल्पां सोमवाः तानसेनय् ग्वसाः ग्वःगु अन्तर्त्रिmयाय् शर्मां नेताया काय् म्ह्याय्पिंत ब्वंकेत ठेकेदार व शैक्षिक माफिया नं तयार जुयाच्वंगु धयादिसें अथे जुइमबीकेगु धयादिल । जनताया काय् म्ह्याय्पिंसं ब्वनीगु सरकारी विद्यालयसं हे काय् म्ह्याय्पिंत मब्वंकूसा अज्याःपिं नेतातय्त कारबाही यायेत पार्टीयात सिफारिस यायेगु वय्कःया धापू खः । विद्यार्थी नेता शर्मां माओवादी नेतातय्त निजी विद्यालय व क्याम्पसय् लगानी याकेमबीगु न्ह्यःथनादिसें गोप्य रुपय् सुनां नं याःगु सिलधाःसा भण्डाफोर यायेगु नापं धयादीगु खः ।

निजी विद्यालयपाखें काय् म्ह्याय्पिंत चीकेत व निजी विद्यालयसं लगानी मयायेत पार्टीइ एजेण्डाया हे रुपय् सहलह न्ह्याःगु शर्मां जानकारी बियादिल । वय्कलं पार्टीया हे नेतां भातृ सङ्गठनया अभियानय् ग्वाहालि मयाःसा मेमेगु दल व सरकारी कर्मचारीतय्त बाध्य यायेत नैतिक रुपय् ज्यामछिनीगु जूगुलिं पार्टीइ थज्याःगु नीति लागू याकेगु धयादिल ।
सार्वजनिक विद्यालय कमजोर दयेकाः निजी विद्यालययात न्यंकाः शिक्षायात चरम निजीकरण यायेगु योजना ताःलाके मबीगु वय्कलं घोषणा नापं यानादिल । त्रिवि स्ववियु सभापति नापं जुयाः च्वनादीम्ह वय्कलं त्रिभुवन विश्वविद्यालयया शैक्षिक क्यालेण्डर कथं इलय् हे भर्ना, ब्वंकेगु व इलय् परिक्षा सञ्चालन यायेगु योजना कार्यान्वयन यायेत थःपिं ताःलाइगु दाबी नापं यानादिल ।