न्यागू जातीय संगठनं स्वंगू दलदथुइ जूगु न्यागू बुँदे सम्झौता च्याकल

संविधानसभा विघटन यानाः मेगु निर्वाचनय् वनेत माग

येँ (झीगु स्वनिगः)

न्यागू जातीय संगठनतय्सं संविधानसभाया ई स्वला तनेगु कथं जेठ १४ गते चान्हय् स्वंगू तःधंगु दलं याःगु न्यागू बुँदे सहमति च्याकूगु दु । संविधान दयेकेमफुगु असफल संविधानसभा विघटन यानाः सर्वजातीय संयुक्त राष्ट्रिय सरकार नीस्वनाः संविधानसभाया न्हूगु निर्वाचन यायेत माग यानाः वयाच्वंगु जातीय संगठनतय्सं सोमबाः रिपोर्टर्स क्लब नेपालय् याःगु पत्रकार सम्मेलनय् हे च्याकूगु खः । थरुहट स्वायत्त राज्य परिषद, संघीय लिम्बुवान राज्य परिषद, संघीय लोकतान्त्रिक राष्ट्रिय पार्टी, आदिबासी जनजाति अधिकार मञ्च व ताम्सालिङ स्वायत्त राज्य परिषद्ं विहीबाः रिपोर्टर्स क्लब नेपालय् पत्रकार सम्मेलनया ग्वसाः ग्वयाः न्यागू बुँदे सम्झौताय् मधेशीया माग जक न्ह्यःब्वयाः, आदिबासी, जनजाति, मुस्लिम, थारु व दलित लगायतया थीथी पुचःलिसे याःगु सहमतिया बेवास्ता याःगु धासें च्यूताः प्वंकूगु खः ।

इलय् संविधान निर्माण यायेगु दायित्व क्वःबियाः च्वंगु संविधानसभां संविधान दयेके मफयाः थःत असफल प्रमाणित यायेधुंकूगुलिं थुकिया ई न्ह्याक्वः हे तंसां नं संविधान मदयेकीगु उमिगु दाबी खः । उसिमं देशं पाय्छि कार्यदिशा ज्वनेमफुसा देय् झन् तःधंगु ल्वापुइ वनीगु धयादिसें याकनं सर्वजातीय संयुक्त राष्ट्रिय सरकार नीस्वनाः संविधानसभाया न्हूगु निर्वाचन यायेत माग याःगु खः । उगु जातीय संगठनतय्सं आःया निकासया विकल्प नं थ्वहे जूगु दाबी याःगु दु । उमिसं थःपिनिगु घोषित आन्दोलनया ज्याझ्वःपाखें सोमबाः प्रचारात्मक ज्याझ्वः अन्तर्गत पत्रकार सम्मेलन याःगु खः । उमिसं नेपाल सरकार संयुक्त राष्ट्र संघ व सार्क सचिवालयसं ज्ञापन पौ लःल्हायेगु, संविधानसभाया औचित्य क्वचाःगु घोषणा यायेगु, संघीय विधायिकाया रुपय् द लिग अफ फस्र्ट नेसन्स नीस्वनेगु, सर्वजातीय सम्मेलन ग्वसाः ग्वयाः सर्वजातीय सरकार घोषणा यायेगु, राज्य लिसे क्षेत्रया कर व प्राकृतिक साधनय् कब्जा यायेगु लगायत आन्दोलनया ज्याझ्वःत यायेगु नापं जानकारी ब्यूगु दु ।