सरकारी ढिलासुस्तीं ताँ निर्माणय् पंगः

धरान (झीगु स्वनिगः)

वषर्ाया इलय् वःगु वां भेल छ्यलाः वनेम्वालेमाः धकाः लखौं तकाया ग्वाहालि याःपिं सुनसरीया पाँचकन्याबासीत तांपाखें खुसि छीगु म्हगस थुगु दँ नं पूमवंगु दु । धरानपाखें थ्यंमथ्यं न्यागू किलोमिटरया दूरीइ दुगु पाँचकन्या २ स्थित शेरा खुसिइ पक्की ताँ निर्माणया नितिं स्थानीयबासीं सप्ताह महायज्ञ ग्वसाः ग्वयाः थ्यंमथ्यं डेढ करोड तका धेबा मुंकूगु खः । सुनसरीया धरान, पाँचकन्या व मोरङ्गया याङशिला व केराबारी स्वाइगु सतकय् लाःगु खुसिइ ताँ मदयाः उगु क्षेत्रया थ्यंमथ्यं न्यय्द्वः जनतां वषर्ातया इलय् सास्ती फयाः वयाच्वंगु दु ।

जनतां मेहनत यानाः थःम्हं हे श्रोत चूलाकूसां नं सरकारी ढिलासुस्तीया कारण ज्या न्ह्यायेमफुगु पूर्व गाविस नायः रमेश बस्नेतं जानकारी बियादिल । ताँ निर्माणया नितिं स्थानीय जनता थःपिं हे जागरुक जूसां नं सरकारं ग्वाहालि मयाःगु सेरा खोला पुल निर्माण समितिया नायः मानबहादुर योञ्जनया धापू खः । निदँया दुने तां निर्माण यायेगु ज्या क्वचायेकेगु लक्ष्य दुगु खः । ताँ दयेकीगु आशां स्थानीयबासीं थःम्हं नयेगु नसाय् बच्छि क्वःपालाः जूसां नं ग्वाहालि यानागु खुला बिइत्यन नं ताँ दयेकेगु ज्या मन्ह्यानिगुलिं नीयबासीपिनि नुगः मछिंका च्वनेत बाध्य जुयाच्वंगु दु ।

पाँचकन्या क्षेत्रय् उत्पादन जूगु तरकारीं धरान बजाःयात कःघानाः वयाच्वंगु दु । उगु क्षेत्रय् उत्पादन जूगु तरकारी लगायत पशुजन्य उत्पादन नं धरानय् दुहांवनेगु यानाच्वंगु दु । ताँ दयेकेगु नितिं निगू करोड नीनिगू लख नीद्वः व प्यसः व न्यय्प्यतकाया लागत इस्टिमेट यानाः नक्साङ्कन नापं जुइधुंकूगु खः । तर नेपाल सरकारया मापदण्ड कथं ब्या खुगू मिटर जुइमाःगु कानुनी व्यवस्था पूमवंगु धासें ताँ दयउेकेगु ज्याय् लिबाःगु खः । ब्या अप्वयेकेमाःगुलिं मेगु नक्सा दयेकेमाःगु व लागत खर्च नं अप्वइगु जूगु निर्माण समितिं जानकारी ब्यूगु खः ।

More Stories Like this