नेवाः स्वायत्त राज्य पिनेया नेवाः

नेवाः न्ह्यलुवाः मल्ल के. सुन्दर

नेवाःत नेवाः स्वायत्त राज्ययादुने जक मखु नेपाः देय्या न्यंकभनं उलिहे दु । नेवाः स्वायत्त राज्यय् ६० गू प्रतिशत सिबें अप्वः ल्याः नेवाःत दुथ्याइ सा मेगु ल्यं जक स्वायत्त राज्यया पिने लाइगु जुइ । तर देय् न्यंकया नेवाः तय्सं नेवाः स्वायत्त राज्य जिमिगु नं खः धकाः स्वामित्वया वोध याके मफुत धाःसा नेवाः स्वायत्त राज्यया वैधताय् मेगु न्ह्यसः ब्वलने फु । नाप नापं सकल नेवाःया समर्थन व सहयोग मदयेक नेवाः स्वायत्त राज्य धिसिलाक्क धस्वाये नं थाकुइ । सिद्धान्ततः नेवाः स्वायत्त राज्य देय्या सकल नेवाःतय् मंका प्रतिनितित्व याइगु राजनीतिक इकाई खः । तर, ब्यवहारय् नं थुकिया अनुभूति यायेगु कुतः मजुसें मगाः गथे पिनेया नेवाः समुदायपिन्सं नेवाः स्वायत्त राज्यया उन्नति व विकासया नितिं सदां च्यूताः क्यनाच्वने फयेकेमाः ।

अथेहे, स्वायत्त राज्यदुनेया पिंन्सं नं पिनेया नेवाःतय्गु समस्या व मुद्दायात कयाः केन्द्र वा सम्बन्धित राज्य सरकारनाप खँल्हाबल्हाँयासें समस्या ज्यंकाबीगु संरक्षकत्वया मूमिका म्हितेमाः । नेवाः स्वायत्त राज्यपिने नेवाःतय् वाहुल्यदुगु गुगु नं लागाय् नेवाःतय्गु स्वायत्त इलाका वा स्वशासित क्षेत्र स्वनेफइगु संभावना दुसा उकिंया नितिं नं नेवाः स्वायत्त राज्यपाखें नेतृत्वकारी भाला क्ववुइमाः । अथेहे, मेगु महत्वपूर्ण खँ नेवाः स्वायत्त राज्य सरकारपाखें पिनेया सुनं नेवाःयात थःगु राज्यया नागरिक कथं दुथ्याकेगु व उकथं वयात फुक्क अवसर व सुविधा बीगु उदार नीति नालेमाः । अथेहे, स्वनिगःपिनेया नेवाःतय् प्रतिनिधित्व जुइ कथं नेवाः स्वायत्त राज्यया विधायिकाय् निश्चित ल्याखय् थाय् तकं सुनिश्चित याना बीमाः । थुकिंयानाः पिनेया गुम्हं नें नेवाःयात नेवाः स्वायत्त राज्यया मुख्यमन्त्रीनिसें विधायक जुइगु समान अवसर दयाच्वनी । पिनेया नेवाः नेवाः स्वायत्त राज्यया दथ्वीया भावनात्मक व आत्मिय स्वापूया थ्व छगू प्रभावशाली लँपु खः ।