"र" यात ज्ञानेन्द्रया विन्तिपत्र

संविधानसभाया म्याद थपय् यायेगु खँय् संसदीय दलतय्सं म्वाःमदुगु शर्तत न्ह्यःने तयाः संविधानसभा भंग यायेत स्वयाच्वंगु इलय् हाल येँय् च्वनाच्वंम्ह भारतीय गुप्तचर संस्थाया वरिष्ठ अधिकृत आलोक जोशी लगायत व्यक्तिपिं नापलानाः पुलांम्ह जुजु ज्ञानेन्द्रं थःयात हानं जुजुयाना वीत विन्तिपत्र लःल्हाःगु दु । संविधानसभा भंग यायेत सनाच्वंम्ह विस्तारवादी भारतं थः गुप्तचर संस्थाया वरिष्ठ अधिकारीत येँय् छ्वयाहयाः सरकारया वहुमत जुइगु अवस्थायात उपेन्द्र यादवया फोरमयात जय प्रकाश गुप्ता मार्फत करौडौं ध्यबा नकाः तछ्याना वीत ताःलायेवं संविधान सभा नं न्ह्यात्थें यानाः नं भंग याकेत सकृय "र"या एजेण्टत अन्तत असफल जुल व नेपाली कांग्रेसयात सहमतिइ हयाः संविधानसभाया म्याद स्वला थपय् यानाः स्वंगू दलत न्ह्याःवनेवं भारतया चाहना पूमवन ।

उखें जुजुवादी कमल थापाया राष्ट्रिय प्रजातन्त्र पार्टी, नेपालं सतकं राजतन्त्रया पुनस्र्थापना जुइमाः, संविधान सभा भंग यायेमाः लगायत माग न्ह्यथनाः, नारा थ्वयेकाः वयाच्वंगु दु । राजतन्त्रयात कया जनमत संग्रह यायेमाःगु खँय् बहः वियाच्वंगु दु । अथेहे हिन्दुवादी राष्ट्रिय युवा संघ शिवसेना लगायत धार्मिक व साम्प्रदायिक पुचःतय्सं खुल्लेआम राजतन्त्रया समर्थनय् नारा थ्वयेकाच्वंगु जक मखु, खुद नेपाः राज्ययात हिन्दु राष्ट्र घोषणा यायेमाःगु धयाच्वंगु दु । थुमिसं भारतं ध्यबा व मनूत आयात याकाः नेपालय् धर्मया नामय् हुलदंगा यायेगु, समाजविरोधी गतिविधि यायेगु, साम्प्रदायिक दंगा यायेगु व अन्तत भारतया ग्वाहालिं नेपालय् जुजु सहित हिन्दु राष्ट्र घोषणा यायेगु स्वयाच्वंगु दु । पुलांम्ह जुजु ज्ञानेन्द्रं थः हानं जुजु जुइदैगु म्हगस स्वयाच्वंगु दु । उपेन्द्र यादवया फोरमयात तछ्यायेत ताःलाःगु लिपा ज्ञानेन्द्रं भारतीय गुप्तचर संस्था "र" या येँय् च्वनाच्वंपिं वरिष्ठ अधिकारीत नाप लानाः राजतन्त्रया पुनर्वहाली यानावीत हारगुहार यानाः जूगु स्वये मानो राजतन्त्र आः थत्थेहे लिहां वइ व थुकिया नितिं भारतीय गुप्तचर संस्था "र" सक्षम दु ।

ध्यबा नकाः पार्टी तछ्यायेगु अःपु राजतन्त्रया पुनर्वहाली यायेगु असम्भव । भारतं थः गुप्तचर संस्था "र" या फुक्क एजेन्टत नेपाः छ्वयाहयाः पालिंनिसें बहः व्यूसां थ्व सम्भव मदये धुंकल । सामान्य नागरिकय् रुपान्तरित जुइ धुंकाः आः हानं न्हिनय्हे जुजु जुइत स्वयेगु म्हगस ज्ञानेन्द्र त्वःतेमाः । मखुसा थुकि लिच्वः ज्ञानेन्द्रं व उया सकल परिवारं फयेमाली । सीधुंकूगु लाशयात ज्यानतयाः हानं चिहानं थनाहयेगु कुतः यायेमज्यू । नेपालय् थ्व सम्भव मदु ।

More Stories Like this