विद्या भण्डारीं छन्हु लिपा हे छाय् भाय् हीकल ?

श्रीकृष्ण महर्जन

भारत नाप लिक्क लाःम्ह धकाः मनूतय्सं थुइकाः वयाच्वंम्ह एमालेया नेता केपी शर्मा आलीं स्यंगु भाय् जक ल्हाइम्ह धकाः धयातःम्ह एमालेया न्वकु नापं पुलांम्ह रक्षा मन्त्री विद्यादेवी भण्डारीं वंगु आइतवाः ल्हाःगु भाय् हिलाः सोमवाः ल्हानादीगुलिं अथे छन्हु लिपा हे छाय् भाय् हिलेगु ज्या जुल धकाः मनूतय्सं न्ह्यसः तयाहःगु दु । नेतृ भण्डारीं वंगु आइतवाः विरातनगरया विमानस्थलय् संचाकर्मीतलिसे खँल्हासें प्रधानमन्त्री झलनाथ खनालं राजीनामा बिइवं हे समस्या समाधान जुइमखु धयादिसें राष्ट्रिय सहमतिया सरकार निर्माण जुइगु वातावरण तयार जुइवं प्रधानमन्त्रीं राजीनामा बियादी उकिं आः थत्थें हे राजीनामा माग यायेगु पाय्छि मजू धकाः धयादिल ।

वय्कलं अथे सार्वजनिक रुपं न्वंवानादीगु न्हिच्छि चच्छि अर्थात २४ घण्टा हे पू मवनेवं हाकनं म्हिगः सोमवाः सुथय् झापाया काँकडभिट्टाय् जूगु छगू समारोहलय् न्वंवासें प्रधानमन्त्री खनालं तत्काल हे राजीनामा बिइमाः धकाः भाय् हिलाः न्वंवानादीगु दु । अथे छन्हु लिपा हे नेतृ भण्डारीं भाय् हिलाः न्वंवाःगुयात मनूतय्सं अर्थपूर्ण रुपं कयाहःगु दु । वंगु आइतवाः सुथय् जक संविधानसभापाखें संविधानसभाया म्याद स्वलाया नितिं थप यायेगु धकाः निर्णय याःगु खः । एकीकृत माओवादी, नेपाली कांग्रेस व एमालेया दथुइ न्यागू बुँदाया सहमति जूगु कथं हे अथे संविधानसभाया म्याद थप यायेगु ज्या जूगु खः । भारतं थःगु पक्षयाम्ह मखु धकाः तायेकाः च्वंम्ह प्रधानमन्त्री खनालयात राजीनामा बिइकेगु नितिं नापं फत धाःसा संविधानसभा हे भंग यायेगु नितिं भारतीय गुप्तचर संस्था 'रअ'या प्रतिनिधित छवाः न्ह्यःनिसें येँय् हे च्वनाः वियाच्वंगु अले इमिसं हे वर्तमान सरकारवादी पक्षय् दुई तिहाई बहुमत मदयेकेगु नितिं मधेसी जनअधिकार फोरम तछ्यायेगु ज्या तकं याःगु खः । वंगु शनिवाःनिसें आइतवाः सुथय् तक हे संविधानसभाया जःखः च्वनाः प्रधानमन्त्रीया राजीनामा कायेगु नितिं तसकं कुतः याःपिं 'रअ' या प्रतिनिधितय्सं हे प्रधानमन्त्रीया राजीनामा व मधेसी मोर्चालिसे न्हापा जूगु सहमति प्रभावकारी कार्यन्वयन यायेगु धकाः सहमति पतिइ दुथ्याकेगु ज्या तकं जुल धैगु खँ दु ।

विशेषयानाः शनिवाः चान्हय् १२ बजे एमालेया माधव नेपाल व केपी ओली छेँय् वनेगु धकाः पिहां वनाः 'रअ'या मनूतय्के अनुमति कयाः वयाः जक सहमति याःगु धकाः नं मनूतय्सं धयाच्वंगु दु ।
अथे भारतया 'रअ' या योजना प्रधानमन्त्रीया राजीनामा धकाः आइतवाः सुथय् तक मसिया एमालेया नेतृ भण्डारीं थःगु नुगःया खँल्हानाः राजीनामा आवश्यकता मदु धयादीगु अले माधव ओलीया फोन वने धुनेवं हाकनं कन्हय् खुन्हु अथे धैगु सोमवाः हे प्रधानमन्त्रीं तत्काल राजीनामा बिइमाल धकाः न्वंवानादीगु खयेमाः धकाः अःपुक हे अनुमान यायेछिं । नेपाःया राजनीतिक दलया सु सु नेतातय्सं आः 'रअ'या योजना कथं भाय् हिलाः हइगु खः व धाःसा स्वयेगु ल्यं हे दनि ।